Qeveria parashikon tre ndërhyrje me fokus gazin natyror në sektorin energjetik për periudhën 2025–2029. Në programin qeverisës, që tashmë është publikuar në Fletoren Zyrtare, është theksuar konvertimi i TEC-it të Vlorës nga naftë në gaz natyror, duke vënë në dispozicion rreth 250 MW kapacitete të reja prodhimi. Po ashtu, në dokument rikonfirmohet plani për ta lidhur këtë vepër energjetike me Gazsjellësin Trans-Adriatik (TAP), që sikurse është bërë e ditur më herët synon të sjellë furnizim të qëndrueshëm me karburant më të pastër dhe kosto operative më të ulëta.
Ndërhyrja e dytë lidhet me TEC-et lundures, të pozicionuar në Triport dhe në afërsi të TEC-it të Vlorës. Sipas programit qeverisës, synohet konvertimi i tyre nga nafta, në gaz natyror çka sugjeron se këto impiante do të vijojnë të qëndrojnë në vendin tonë. Këto TEC-e u morën me qira për një peirudhë 2-vjeçare nga momenti i nisjes së funksionimit të tyre, ndërsa referuar të dhënave ndezja e tyre u bë në fillim të vitit 2024. Kjo do të thotë se mbeten edhe pak muaj deri në përfundimin e kontratës së qirasë, për të cilën janë parashikuar detyrimet financiare prej 63,000 USD qira ditore dhe kosto ditore e operimit dhe mirëmbajtjes së asetit prej 31,500 USD.
Ndërkohë, projekti i tretë është gazifikimi i qytetit të Korçës. Sipas programit, investimet për këtë projekt parashikohen në mbi 50 milionë euro në rrjetin e transmetimit dhe shpërndarjes./Scantv
