Verbund Green Power, një filial i kompanisë shtetërore austriake të energjisë Verbund, ka nënshkruar një marrëveshje kuadër shumëvjeçare me prodhuesin lider të turbinave të erës, Nordex Group, për prokurimin e mundshëm të turbinave me një kapacitet total deri në 700 MW, sipas një njoftimi të përbashkët për shtyp.
Marrëveshja do të jetë në fuqi deri në vitin 2030.
Ajo u nënshkrua zyrtarisht në zyrën e Verbund Green Power në Madrid nga Dietmar Reiner, Drejtor Menaxhues i Verbund Green Power, dhe José Luis Blanco, Drejtor Ekzekutiv i Nordex Group.
Palët shprehën gatishmërinë për të lehtësuar furnizimin dhe dorëzimin e deri në 105 turbina tokësore (onshore) të Nordex për projektet e energjisë së erës të Verbund Green Power. Këto projekte planifikohen të zhvillohen në Austri, Gjermani, Spanjë, Itali, Rumani dhe Shqipëri.
Vlen të theksohet se Christopher Billot, Drejtor i Shitjeve për rajonin e Mesdheut në Nordex Group, deklaroi në Belgrade Energy Forum 2025 se Ballkani është një rajon kyç për kompaninë.
Marrëveshja do të mbulojë rreth 50% të portofolit të projekteve të energjisë së erës të Verbund Green Power.
Drejtori Ekzekutiv i Nordex Group, José Luis Blanco, shpjegoi se përmes kësaj marrëveshjeje shumëvjeçare, kompania do të ofrojë kapacitetet e nevojshme të turbinave për të kthyer një portofol ambicioz projektesh në prodhim të energjisë së pastër në gjashtë tregje evropiane.
“Me deri në 700 MW nga turbinat tona tokësore më të fundit të klasës 7 MW, të planifikuara në Austri, Gjermani, Spanjë, Itali, Rumani dhe Shqipëri, ne po krijojmë një rrugë të qartë për të ofruar energji të erës të besueshme dhe me kosto efikase, së bashku me Verbund, deri në vitin 2030,” theksoi ai.
Blanco kujtoi se në fund të vitit të kaluar Nordex mori një porosi të parë nga Verbund për nëntë turbina N175/6.X për Rumani. “Ne po zgjerojmë praninë tonë në këtë vend,” shtoi ai.
Sipas Drejtorit Ekzekutiv të Verbund, Michael Strugl, bashkëpunimi me Nordex mbështet objektivin strategjik të kompanisë për të rritur prodhimin e energjisë nga burimet e rinovueshme në të gjithë Evropën.
“Kjo forcon opsionet tona të furnizimit ndërsa projektet tona maturohen, duke na lejuar të sigurojmë zinxhirin e furnizimit në një mjedis shumë konkurrues dhe të përmbushim objektivat e ‘Mission V’, duke kontribuar në një tranzicion energjetik të sigurt dhe të përshpejtuar në tregjet tona,” shtoi Strugl./Përshtati nga BalkanGreenEnergy News, ekofin.al
