Agjencia e Trajtimit të Pronave njofton se nga data 27 Janar 2025 do të pranohen aplikimet për kompensimin financiar të pronarëve për ato pasuri që janë prekur nga ndërtimet informale, sipas VKM Nr. 3, datë 09.01.2025.
Procesi i aplikimeve do të jetë online dhe do të realizohet përmes e-Albania, duke kërkuar seksionin “Aplikim për kompensim në vlerë për pronarët e pasurive të paluajtshme, pronë private që preken nga ndërtimet informale”.
Subjekti aplikues gjatë aplikimit online, duhet të ngarkojë, por edhe më pas të dërgojë me postë në ATP dokumentacionin e nevojshëm, i cili përbëhet nga kërkesa për kompensimin e pronës; Dëshminë e trashëgimisë për të gjithë trashëgimtarët e ligjshëm të subjektit përfitues; Prokurën e posaçme, të nënshkruar nga të gjithë subjektet që përfitojnë kompensim (Nëse kjo nuk është e mundur, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet. Në këtë rast, paguhet tarifë shërbimi në vlerën 2 000 lekë nga secili bashkëpronar, pavarësisht se i përket të njëjtës pasuri të paluajtshme);
Ndër dokumentat e tjera që duhet të ngarkohen online, si edhe të dorëzohen fizikisht janë vërtetimi origjinal i bankës për llogarinë bankare në emër të subjektit përfitues; Fotokopja e dokumentit të identifikimit; si edhe mandat-pagesa për tarifën e shërbimet prej 2 mijë lekësh.
Subjektet përfituese, kërkesa e të cilëve nuk është pranuar për mungesë dokumentacioni gjatë procedurave të mëparshme, kanë të drejtë të riaplikojnë. Këto subjekte nuk paguajnë tarifë shërbimi, nëse provojnë pagimin e saj gjatë aplikimit të mëparshëm.
Referuar vendimit të fundit të qeverisë më 9 janar, për këtë proces janë në dispozicion rreth 1 miliard lekë dhe procesi i aplikimit nuk do të jetë i kufizuar apo i kushtëzuar në kohë. /ekofin.al
