Duke filluar nga 1 Prilli paga minimale në vend do të rriten në 40 mijë lekë, bëri me dije ministrja e Financave dhe Ekonomisë Delina Ibrahimaj. Vendimi është miratuar sot në mbledhjen e Këshillit të Ministrave.
“Në mbledhjen e Këshillit të Ministrave u mor sot vendimi për përcaktimin e pagës minimale, e cili shkon nga 34 mijë lekë në 40 mijë lekë. Për 9 mujorin 2022 pagat mesatare në sektorin privat janë rritur me 12.3 për qind. Rritja që sot u miratua është prej 6 mijë lekësh bruto, dhe është në nivel prej 17.6 për qind më e lartë se sa paga që aktualisht është në treg.
Kjo pagë i atribuohet si sektorit privat edhe atij publik. Çdo punëmarrës dhe punëdhënës është i detyruar të zbatojë vendimin e pagës minimale që nga data 1 prill. Që do të thotë që në pagën që punonjësit do të marrin më muajin maj do të jetë e reflektuar rritja”.
Ministrja tha se qeveria ka miratuar edhe një vendim tjetër i cili do të shkojë në mihmë të sektorit të bujqësisë, pyjeve dhe peshkimit, dhe të sektorit të industrisë përpunuese., ku do të subvencionohet elementi i rritjes së kostos shtesë të kontributeve shoqërore, duke filluar që nga muaji dhjetor.
“Kjo ndihmë vjen në suport të atyre bizneseve që kanë një numër të lartë punonjësish. Numri i përafërt që përfitojnë nga kjo masë është rreth 30 mijë persona. Kjo mbështetje do të jepet të gjithë subjekteve për të mbështetur koston shtesë gjatë gjithë vitit 2023. Është një politikë që do të ndiqet në vijimësi nga qeveria shqiptare edhe për vitet në vijim, për të gjitha rritjet të pagës minimale të cilat do të jenë më të larta se sa rritjet normale që kanë qenë të zbatuara vitet e kaluara”.
