Teksa debati për ndërhyrjet në zonat e mbrojtura, veçanërisht në Zvërnec dhe kompleksin natyror Vjosë-Nartë, vijon të dominojë diskutimin publik, me protestat që kanë hyrë në javën e tretë, Ministria e Mjedisit ka hedhur për konsultim publik një projektligj të ri që synon të forcojë mbrojtjen e faunës së egër në Shqipëri.
Projektligji “Për disa shtesa dhe ndryshime në ligjin ‘Për mbrojtjen e faunës së egër’” vjen në një moment kur çështja e ruajtjes së biodiversitetit është kthyer në një nga temat më të nxehta të debatit politik dhe mjedisor në vend.
Sipas dokumentit të publikuar për konsultim, ndryshimet synojnë të përmirësojnë kuadrin ligjor për mbrojtjen e specieve të egra, të forcojnë monitorimin e habitateve natyrore dhe të harmonizojnë legjislacionin shqiptar me standardet e Bashkimit Evropian.
Koha e prezantimit të projektligjit nuk kalon pa u vënë re. Prej javësh, Zvërneci dhe zona e mbrojtur e Vjosë-Nartës janë në qendër të protestave dhe polemikave për shkak të projekteve të zhvillimit turistik në territorin e mbrojtur. Çështja ka tërhequr vëmendjen jo vetëm të organizatave mjedisore shqiptare, por edhe të institucioneve europiane, të cilat kanë kërkuar respektimin e plotë të legjislacionit mjedisor dhe standardeve të BE-së.
Nga ana tjetër, qeveria ka mbrojtur qëndrimin se Shqipëria ka zgjeruar sipërfaqen e zonave të mbrojtura dhe se çdo investim do t’i nënshtrohet procedurave mjedisore dhe vlerësimeve të ndikimit në mjedis.
Projektligji synon të përmirësojë mekanizmat e ruajtjes dhe menaxhimit të faunës së egër, duke vendosur theks më të madh te mbrojtja e specieve të rrezikuara, monitorimi i popullatave të kafshëve të egra dhe ruajtja e habitateve ku ato jetojnë. Gjithashtu, ai synon të forcojë luftën kundër gjuetisë së paligjshme dhe dëmtimit të ekosistemeve natyrore.
Rëndësia e këtyre ndryshimeve lidhet drejtpërdrejt me pasurinë natyrore të vendit. Sipas analizave të publikuara së fundmi nga ekspertë të mjedisit, zonat e mbrojtura në Shqipëri mbulojnë mbi 21% të territorit kombëtar dhe përfaqësojnë një nga asetet më të rëndësishme të biodiversitetit në Evropën Juglindore. Ato strehojnë mijëra specie bimore dhe shtazore, ndërsa luajnë rol kyç në mbrojtjen e burimeve ujore, tokës dhe ekuilibrave natyrorë.
Në këtë kontekst, projektligji i ri për faunën e egër shihet si një përpjekje për të përforcuar instrumentet ligjore të mbrojtjes së biodiversitetit. Ndryshimet pritet të fokusohen në mbrojtjen e specieve të rrezikuara, kontrollin e aktiviteteve që mund të dëmtojnë habitatet natyrore dhe rritjen e përgjegjësive institucionale për monitorimin e gjendjes së faunës. /ekofin.al
