Përmes një udhëzimi të posaçëm, të firmosur nga Ministri i Ekonomisë, Kulturës dhe Inovacionit, Blendi Gonxhja, Qeveria ka ndryshuar kriteret dhe mënyrën e monitorimit për agjencitë ndërmjetësuese të punësimit. Në udhëzimin e publikuar në fletoren zyrtare, theksohet ndër të tjera se kërkesat e subjekteve fizike/juridike, që zhvillojnë veprimtari të ndërmjetësimit në tregun e punës, që kanë aplikuar në Qendrën Kombëtare të Biznesit (QKB) për t’u pajisur me licencë për ndërmjetësimin në tregun e punës, kalojnë në mënyrë elektronike pranë Drejtorisë së Politikave të Punësimit dhe Migratore, në MEKI.
Më tej, nëse dokumentacioni për licencimin është i plotë dhe i rregullt, ai i përcillet inspektoratit shtetëror të punës, që kryen edhe vlerësimin faktik në vend për kriteret e licencimit.
Pas kryerjes së shqyrtimit të dokumentacionit dhe inspektimit në vend, dërgon zyrtarisht procesverbalin e vlerësimit faktik të plotësimit ose jo të kritereve përkatëse të licencimit brenda 7 ditëve, nga marrja e kërkesës dërgohet në drejtorinë përkatëse në ministrinë përgjegjëse për çështjet e punës.
Më tej, sërish drejtoria e politikave të punësimit plotëson dosjen dhe ia dërgon atë për vendimarrje Ministrit. Do të jetë ai që do të vendosë për miratimin ose jo të dosjes së licencimit. Nëse kërkesa miratohet, ajo i përcillet QKB-së, e cila pajis me licencë subjektin ofrues të ndërmjetësimit në punë me kodin X.2.A.
Gjithashtu, udhëzimi i Ministrit, që ka hyrë tashmë në fuqi, përcakton edhe mënyrën sesi do të realizohet monitorimi periodik, si edhe revokimi i licencës.
Subjektet e licencuara sipas këtij udhëzimi, i nënshtrohen një kontrolli periodik të paktën 1 (një) herë në vit, i cili kryhet nga inspektorati shtetëror që mbulon fushën e punës dhe/ose nga drejtoria përkatëse në ministrinë përgjegjëse për çështjet e punësimit, sipas planit të punës së miratuar nga drejtori i përgjithshëm, thuhet në udhëzim.
Për të gjithë subjektet e licencuara do të mbahet një regjistër i posaçëm dhe gjithashtu, ato kanë detyrim ligjor të raportojnë çdo 6 muaj në lidhje me numrin e të ndërmjetësuarve të evidentuar me shtetësinë e tyre, si edhe subjektet tregtare dhe numrin e të punësuarve që kanë punësuar nga të ndërmjetësuarit.
Një nga qëllimet kryesore të ndryshimeve në udhëzimin e fundit të MEKI është pikërisht krijimi i një databaze më të plotë në lidhje me subjektet që operojnë si ndërmjetës në tregun e punës. /ekofin.al
