Autoriteti Rrugor Shqiptar ka shpallur kontratën për riparimin e segmentit rrugor Vorë-Ura e Dajlanit, që lidh zonën e veriut me jugun e vendit dhe Portin e Durrësit me kryeqytetin.
Ky segment me gjatësi rreth 20 km, i ndërtuar në vitin 2001, shërben si një arterie kyçe në korridorin ekzistues veri–jug dhe është një nga rrugët më të ngarkuara në vend, ku trafiku i mjeteve të rënda zë një pjesë të konsiderueshme.
Gjatë viteve, shtresat asfaltike të kësaj rruge janë dëmtuar nga përdorimi i vazhdueshëm dhe faktorë të ndryshëm, duke shkaktuar dëmtime serioze si rrjetëzime, gropa dhe dëmtime deri në nënshtresa në disa zona.
Ndërhyrjet e herëpashershme për riparimin e këtij segmenti kanë qenë të pamjaftueshme për të garantuar cilësinë e rrugës. Kontrata për riparimin e plotë të këtij aksesi rrugor, me dy karrexhata dhe trafikndarës tip “New Jersey”, është vlerësuar në shumën prej 77,1 milionë lekë, me një afat realizimi prej dy muajsh nga data e fillimit të punimeve.
Për shkak të rëndësisë së kësaj rruge dhe ngarkesës së trafikut, planifikimi i menaxhimit të trafikut gjatë punimeve do të jetë fleksibël dhe do të përshtatet në varësi të avancimit të punimeve.
Rrugët alternative për devijimin e trafikut do të ndryshojnë vazhdimisht deri në përfundimin e tyre.
Ky plan do të hartohet nga kontraktori në bashkëpunim me mbikëqyrësin dhe do të miratohet nga ARRSH në koordinim me Drejtorinë Vendore të Policisë.
Ky projekt synon të përmirësojë ndjeshëm cilësinë dhe sigurinë e këtij segmenti rrugor, duke kontribuar në zhvillimin e infrastrukturës rrugore dhe lehtësimin e qarkullimit për të gjithë përdoruesit e rrugës.
