Muzet e Gjirokastrës, si ai Etnografik, muzeu i “Ismail Kadare”,“Sokaku i të marrëve” dhe shtegu “Edward Lear” e kanë kthyer qytetin e gurtë në një pikë të rëndësishme turistike. Duke sjellë pamje nga dy muzet të cilët janë rinovuar Kryeministri Edi Rama ka përshendetur të gjithë shqiptarët.
“Mirëmëngjes dhe me këto pamje ftuese të dy muzeve të rinj në Gjirokastër, Muzeut Etnografik dhe Muzeut “Ismail Kadare”, që bashkë edhe me “Sokakun e të marrëve” e me shtegun “Edëard Lear”, i kanë dhënë një përmasë të re turistike qytetit të gurtë, ju uroj një ditë të bukur”, u shpreh Rama.
“Përmirësimi dhe Rinovimi i Sistemit të Muzeve në Qytetin e Gjirokastrës” është një projekt që u zhvillua në kuadër të Programit për Zhvillim të Integruar Urban dhe Turizmin, me financim nga Banka Botërore dhe zbatim nga Fondi Shqiptar i Zhvillimit.
Çdo ndërhyrje është trajtuar në mënyrë të tillë që të ruajë vlerat dhe arkitekturën unike të Gjirokastrës me kalanë, rrugët me kalldrëm, muret, çatitë prej guri dhe ballkonet e drunjta.
Sistemimi i muzeve apo i pikava atraktive të qytetit kanë për qëllim zhvillimin e turizmit si dhe nxitjen e turistëve për ta vizituar të gjithë qytetin e gurtë.
