Për mospastrimin e mjedisit, Qeveria do të shkojë deri në vendosjen e sanksioneve ndaj bashkive përkatëse.
Kryeministri Rama në një takim me krerët e bashkive në vend paralajmëroi se kushdo prej kryebashkiakëve nuk pastron territorin do ti merret bashkia nënadministrim.
“Ne do të shkojmë deri edhe në vendosjen e sanksioneve. Sanksione deri në marrjen në administrim të bashkisë, sigurisht me çuarjen e kreut të Bashkisë në Prokurori. Do ta bëjmë këtë nëse nuk do ta gjejmë partnerin e duhur në territori dhe që do të bëjnë që Shqipëria të jetë sezonin e ardhshëm shembull i pastërtisë. Ne i kemi pikat fundore, të gjitha qarqet i kanë”, tha Rama.
Bashkia e cila ka vendosur buxhetin më të madh për pastrimin është ajo e Lezhës, të cilin kryeministri i kërkoi drejtuesve të pushtetit vendor ta ndjekin si shembull.
“Ne do vendosim një duhet të veçantë për bregdetin, në bashkëpunim me bashkitë dhe krerët e bashkive, do të ndajmë barrën, një pjesë do e mbajë bashkia, një pjesë do e mbështesë qeveria, por edhe nëse bëjmë këtë, nëse krerët e bashkive nuk bëjnë të gjithë atë që bën kryetari i bashkisë së Lezhës, problemi nuk do zgjidhet. Shkoni në Lezhë dhe bëni një xhiro dhe gjeni një copë letër. Nuk është rastësi që bashkia e Lezhës ka buxhetin më të madh të vendosur nga vetja që do të thotë se ka respektin që fillon nga pastërtia”, tha Rama.
