Një ndryshim i rëndësishëm në udhëzimet e Ministrisë së Arsimit ka hyrë tashmë në fuqi pas botimit në Fletoren Zyrtare, duke lehtësuar ndjeshëm procedurat për njohjen dhe njësimin e diplomave, gradave dhe certifikatave akademike të fituara në mënyrë online, por vetëm nga një grup i caktuar vendesh me standarde të njohura ndërkombëtare në arsimin e lartë.
Sipas udhëzimit, diplomat online nuk shqyrtohen nga MAS, me përjashtim të rasteve kur ato janë lëshuar nga institucione të arsimit të lartë në Bashkimin Evropian, Shtetet e Bashkuara të Amerikës, Britaninë e Madhe, Kanadanë, Japoninë, Norvegjinë, Izraelin, Zvicrën, Islandën, Australinë dhe Turqinë.
Më konkretisht: “Institucioni përgjegjës për njohjen dhe njësimin në Republikën e Shqipërisë nuk shqyrton aplikimet për rastet: diploma/certifikata profesionale, diploma, grada shkencore për programe studimi të hapura/licencuara si programe studimi online, sipas përcaktimit të diplomës/suplementit/ dokumentacionit zyrtar të lëshuar nga institucioni që ka lëshuar diplomën,… me përjashtim të diplomave/certifikatave profesionale, diplomave, gradave shkencore të lëshuara nga institucione të arsimit të lartë të vendeve BE-së, SHBA-së, Britanisë së Madhe, Kanada, Japoni, Norvegji, Izrael, Zvicër, Islandë, Australi dhe Turqi.”
Përjashtimisht, procedura e njësimit për të gjithë titujt e fituar nga vendet më sipër përfundon brenda 5 ditëve pune nga data e aplikimit, në rast se diploma/certifikata profesionale dhe suplementi ose lista e notave të saj janë të pajisura me vulë apostile. Procedura e rregullt për vendet e tjera përfundon në 30 ditëve kalendarike.
Në rastet kur Qendra e Shërbimeve Arsimore evidenton parregullsi/mangësi në dokumentacionin e paraqitur, mund të nisë procesin e verifikimit të tij, sipas përcaktimeve të këtij udhëzimi.
Me ndryshimet e reja, për të gjithë titujt e fituar në listën e vendeve të sipërpërmendur, QSHA-ja, në kuadër të procedurës së verifikimit, zhvishet edhe nga barra administrative për të kërkuar informacion nëse programi i studimit i përfunduar nga aplikanti është i hapur/licencuar si program studimi online.
Këto ndryshime priten të sjellin një rritje të ndjeshme te aplikimeve për njohje diplomash, sidomos nga studentë shqiptarë që kanë ndjekur studime në distancë në SHBA, BE apo Kanada gjatë dhe pas pandemisë.
Ky vendim mund të ndikojë pozitivisht edhe në rikthimin e trurit nga diaspora akademike, si dhe në zvogëlimin e burokracive për ata që kanë investuar në studime cilësore online në vendet perëndimore. /ekofin.al
