Shqiptarët kanë tendencën të komunikojnë më pak në telefon dhe me mesazhe, ndërsa përdorin më tepër internetin.
Sipas të dhënave të publikuara nga AKEP, tregu i telefonisë celulare në Shqipëri ka shënuar një rënie të përgjithshme në shumicën e treguesve kryesorë gjatë tremujorit të parë të vitit 2025. Shifrat për këtë periudhë tregojnë ulje të ndjeshme si në numrin e pajtimtarëve me karta SIM, ashtu edhe në përdoruesit aktivë të shërbimeve celulare dhe të aksesit në internet përmes rrjeteve mobile.
Në të njëjtën kohë, vihet re rënie në volumin e thirrjeve dalëse dhe të mesazheve SMS të dërguara, ndërkohë që trafiku i të dhënave për përdorues aktiv ka pësuar rritje të lehtë.
Sipas të dhënave zyrtare, numri i pajtimtarëve të shërbimeve celulare sipas kartave SIM në fund të T1 2025 ishte rreth 3,254,911 që përbën një rënie me 4.2% në krahasim me tremujorin e mëparshëm, dhe një rënie me 12.3% në krahasim me T1 2024;
Gjithashtu numri i përdoruesve aktivë të telefonisë celulare gjatë T1 2025 arriti në rreth 2.4 milionë që përbën një rënie me rreth 2.2% me T4 2024 dhe rënie me rreth 1.8% me T1 2024, ndërsa numri i përdoruesve aktivë të aksesit broadband në Internet nga rrjetet celulare në T1 2025 ishte rreth 2 milionë që përbën një rënie rreth 3.4% me tremujorin e mëparshëm, dhe një rritje me 0.4% në krahasim me Tremujorin e parë 2024.
Sa i përket komunikimit zanor, totali i thirrjeve dalëse të gjeneruara nga pajtimtarët celularë në Shqipëri në T1 2025 ishte rreth 974 milionë minuta, me një rënie prej 9.3% në krahasim me tremujorin paraardhës dhe me një rënie prej 3.3% me T1 2024.
Shifrat flasin gjithashtu për një rënie të komunikimit me mesazhe të shkruara. Numri i mesazheve SMS të dërguara nga pajtimtarët e rrjeteve celulare në T1 2025 ishte rreth 88 milion që përbën një rënie me 10% krahasuar me T4 2024 dhe një rënie me 4.8% me T1 2024;
Sasia e trafikut data (Internet) në rrjetet celuare gjatë T1 2025 ishte rreth 56 Milion GByte. Një përdorues aktiv i aksesit broadband celular ka përdorur mesatarisht rreth 9.21 GB Internet në muaj në T1 2025, që përbën një rritje me 3% në krahasim me T4 2024 dhe një rritje me 8.3% krahasuar me T1 2024.
Konsumi mesatar mujor për përdorues aktiv i shërbimeve celulare gjatë T1 2025 ishte: 134 minuta dalëse, 12 SMS dhe 9.21 GB Internet. Krahasuar me T1 2024, konsumi mesatar i thirrjeve pati një rënie me 7.3%, konsumi mesatar i SMS-ve pati një rënie me 7.9% dhe konsumi mesatar i internetit pësoi rritje me 3%./ekofin.al
