Drejtoria e Përgjithshme e Pastrimit dhe Gjelbërimit, institucion në varësinë e Bashkisë së Tiranës ka hapur tenderin për realizimin e një studim- projektimi për rrjetin ujitës me pus. Qëllimi i projektit është që të gjendet vendi më i përshtatshëm për hapjen e pusit si dhe të projektohet që të mund të përballojë me ujitje zonën përreth.
Projekti synohet të zgjidhë lidhjen dhe përcjelljen në një tubacion kryesor shpërndarës. Sipas dokumenteve të tenderit me vlerë 1 milionë lekë i cili mbyllet më 20 qershor, studimi e projektimi duhet të marrë parasysh që prurja e ujit nga pusi të jetë jo më pak se 5 litra/sek.
Dokumenti përcakton termat e referencës për ndërtimin e rrjeti ujitës me pus në katër zona te lumit te Tiranës, ky parashikohet të ndërtohen 4 puse për ujitje dhe përmbushje të nevojave të bimësisë, në zonën e njësisë administrative nr. 4 ; në njësinë administrative Nr.9; në njësinë administrative nr.11 dhe në njësinë administrative nr.8.
Tenderi përmban hartimin e një plani të detajuar për rrjetin kryesor të vaditjes që përfshin vendndodhjen e tubacioneve, lidhjet me puset dhe zonat e vaditjes, përdorimin e materialeve cilësore dhe të qëndrueshme për tubacionet dhe pajisjet e vaditjes si dhe instalimin e tubacionit kryesor dhe shpërndarja e ujit nëpërmjet valvulave dhe sistemit të shpërndarjes së ujit.
Kosto totale e ndërhyrjes do të përcaktohet nga preventivi përfundimtar i objektit, që do të përgatitet bazuar në projektin e zbatimit, specifikimeve teknike duke marrë parasysh edhe kërkesat e veçanta të Investitorit në lidhje me standardet e pranuara. Është parashikuar qe fondi limit i punimeve te zbatimit mos ta kalojë 13,3 milionë lekë pa tvsh.
