Sistemi elektronik i Tatimeve do të pësojë një ndërprerje të shërbimeve mbrëmjen e sotme, kjo për shkak edhe të ngarkesës së madhe të deklarimeve.
Në një njoftim publik, Tatimet theksojnë se për arsye mirëmbajtjeje dhe përmirësimi të cilësisë së performancës, Administrata Tatimore njofton tatimpaguesit dhe individët se sot, datë 31 mars 2025, për rreth 60 minuta, përkatësisht në orën 20:00 – 21:00, do të ketë një ndërprerje të planifikuar të shërbimit në sistemin tatimor e-Filing.
Afati i deklarimit të Divas, i cili ishte më 31 mars u shty në datën 1 prill për shkak të pushimit zyrtar.
Janë rreth 144 mijë individë sipas Tatimeve që duhet të dorëzojnë deklaratën e të ardhurave për vitin 2024 me ndryshimet ligjore, ndërsa deri më 27 mars kanë qenë rreth 87 mijë individë tashmë e kishin dorëzuar deklaratën e tyre.
Dorëzimin e Deklaratës Vjetore të të Ardhurave Personale, DIVA 2024 e kanë të gjithë ata individë rezidentë dhe jo rezidentë, që gjatë vitit 2024:
• kanë pagë bruto vjetore mbi 1.2 milionë lekë;
• janë të dypunësuar, të paktën për një periudhë tatimore brenda vitit;
• realizojnë të ardhura nga burime të tjera mbi 50 mijë lekë në vit për të cilat nuk është mbajtur tatimi në burim.
