71,537 fermerë kanë aplikuar për të përfituar nga fondet e vëna në dispozicion në bujqësi përmes Skemën Kombëtare të Mbështetjes për vitin 2024.
Sipas të dhënave zyrtare të Ministrisë së Bujqësisë, në total janë 69.510 fermerë individualë, 321 grupime fermerësh, 21 Shoqëri të Bashkëpunimit Bujqësor.
Të dhënat tregojnë se nga 8 masa që do të financohen në tërësi, interesi më i lartë ka qenë për skemën e naftës falas për punime të mekanizuara në bujqësi, ku kanë aplikuar 54.225 fermerë, ndjekur nga aplikimet në blegtori me 9288 aplikime; por interes kanë pasur edhe masat e mbështetjes për bletarinë dhe bimët aromatiko mjekësore.
Ministria e Bujqësisë bën me dije se tashmë, ka nisur procesi i vlerësimit administrativ të aplikimeve për ti dhënë përgjigje të shpejtë dhe konkrete përmes financimit.
Këtë vit i është dhënë më shumë përparësi bashkimit të fermerëve, duke u mundësuar financim 100 për qind, ndërsa për aplikantët individualë do të ketë ndarje proporcionale të fondit të mbetur si dhe në një tavan të caktuar, mbështetja përgjysmohet.
Fondi fillestar në dispozicion është 32 milionë euro dhe për herë të parë, paratë për skemën e naftës do të kalojnë direkt në llogaritë e fermerëve. Aplikimet u hapën më datë 27 mars dhe u mbyllën më 19 prill.
