Qeveria ka rritur mbështetjen ndaj sektorit të peshkimit me qëllim zhvillimin e tij dhe shfrytëzimin e potencialeve që ka në ekonomi dhe rritjen e punësimit.
Udhëzimi i Ministrisë së Bujqësisë dhe Zhvilimit Rural, që synon mbështetjen financiare përmes subvencioneve, për disa lloje investimesh në këtë sektor është botuar në Fletoren Zyrtare, duke marrë formë zbatimi.
Referuar relacionit të këtij udhëzimi, mbështetja financiare synon përmirësimin e higjienës, sigurisë dhe kushteve të punës për peshkatarët; mbrojtjen dhe rimëkëmbjen e biodiversitetit dhe ekosistemeve detare; përmirësimin e efikasitetit energjetik të anijeve të peshkimit dhe zvogëlimin e efekteve të ndryshimeve klimatike.
Sipas udhëzimit, në kostot e pranueshme që mbështeten nga ndërhyrjet strukturore përfshihen kostot e nevojshme për blerjen dhe instalimin e pajisjeve të ndryshme në bordin e anijeve që nga gomonet e shpëtimit deri tek kamerat dhe monitorët e sigurisë, të cilat përmirësojnë sigurinë e peshkatarëve. Nga ana tjetër do të mbështetet edhe blerja e një sërë pajisjesh që synojnë përmirësimin e kushteve shëndetësore të peshkatarëve në bordin e anijeve të peshkimit, si kutia e ndihmës së shpejtë, medikamente, si dhe pajisje që lidhen me përmirësimin e kushteve higjienike të peshkatarëve.
Skema e masave mbështetëse në sektorin e peshkimit financohen nga buxheti vjetor i programit për bujqësinë dhe zhvillimin rural, i alokuar për këtë qëllim.
