Kryeministri Edi Rama vlerësoi sot se çelja e programit për përshpejtimin e pranimit të pagesave elektronike në partneritet me Mastercard Europe është një hap konkret për të reduktuar informalitetin dhe për të rritur ritmin e zhvillimit të ekonomisë shqiptare.
Rama theksoi se me mbështetjen e qeverisë dhe një fushatë ndërgjegjësimi për tregtarët dhe qytetarët, ky transformim do të sjellë më shumë mundësi, më pak kosto dhe një ekonomi më të fortë për të gjithë.
Kryeministri vlerësoi se ky është një produkt i mirëpritur për tregun edhe nga bankat e nivelit të dytë dhe është shumë i dobishëm për qytetarët e vendit.
“Për ne është shumë e rëndësishme që Mastercard hyn në Shqipëri si rezultat i faktit që sot e gjen tregun shqiptar të gatshëm për të adoptuar veten me produktin e Mastercard. Por nga ana tjetër, për ne është shumë e mirëpritur ardhja e Mastercard, sepse është koha që revolucioni ynë digjital të thellohet shumë më tepër edhe në drejtim të thjeshtimit dhe përmirësimit të sistemit të pagesave në vend”, tha Rama.
Kryeministri theksoi se Shqipëria ka të dhëna shumë negative për sa i përket përdorimit masiv të parasë fizike (cash) dhe përdorimit minimalist të kartave të kreditit.
Ndërkohë, Rama vuri në dukje se “në momentin që kemi marrë detyrën kanë qenë rreth 30% e qytetarëve me një llogari bankare, ndërsa sot ka shkuar në pothuajse 80%”.
“Kemi një masë që mund ta angazhojmë në gjithë këtë proces. Nga ana tjetër Mastercard na ka nxjerrë herë pas here në shkëlqim në klasifikimet e tij për vendet më të frekuentuara turistike. Shqipëria në turizëm është sot në majë, si vendi me rritjen më të lartë të turistëve mes një grushti vendesh”, tha Rama.
Kryeministri theksoi se rritja e të ardhurave nga turizmi ka shkuar thuajse 5 miliardë euro dhe vetëm 4% e transaksioneve bëhet me kartë krediti.
“Kjo tregon se sa i madh është boshllëku dhe tregon edhe sa shumë para të cilat nuk i takojnë atyre që i mbajnë duhet t’i shkojnë mbrapsht qytetarëve për TVSH dhe sa shumë të ardhura të tjera duhet t’i shkojnë qytetarëve përmes taksave, gjë për të cilën ne besojmë se digjitalizimet e pagesave janë një nga instrumentet themelore, në mos më i drejtpërdrejti”, shtoi Rama.
Kryeministri theksoi se ky program nuk konsiston që të krijohet një fazë me imponim mes qytetarëve dhe bizneseve duke vendosur masa shtrënguese.
“Fillimisht hyjmë me një ftesë për bashkëpunim që Mastercard e materializon me këtë program duke shpërndarë 4750 terminale pagese falas në mënyrë që hotelet, restorantet, marketet dhe taksitë të mund t’i aksesojnë këto pajisje pa qenë të shtrënguar që të dalin dhe t’i paguajnë në treg. Jo vetëm kaq, por Mastercard ka edhe një limit të caktuar për përdoruesit e këtyre pajisjeve që nuk paguajnë asnjë komision. 0% komision deri në një prag vjetor të caktuar. Mbi pragun fillon komisioni”, shtoi Rama.
Kryeministri nënvizoi se subjektet që e përdorin pajisjen e Mastercard kanë një rritje të lëvizjes dhe të dinamikës të numrit të klientëve dhe transaksioneve si rezultat i pamjes së shëndetshme që ka biznesi i tyre.
Rama shprehu besimin se “sot është një ditë shumë e mirë edhe për tregun dhe bankat, por edhe për Mastercard”.
“Mastercard megjithëse është një ‘elefant i madh’, duhet ta dijë se në këtë tregun tonë të vogël ne kemi konsumatorë agresivë. Kjo na bën optimistë për të ardhmen se ekonomia jonë dhe fuqia jonë është individi shqiptar”, tha Rama.
Ndërsa ftoi bankat ta mbështesin këtë proces në mënyrë aktive, Rama theksoi besimin e tij se pas Mastercard do të vijë në Shqipëri edhe shërbimi Visa.
