Rritja e përdorimit të teknologjisë dhe digjitalizimi kanë krijuar më shumë lehtësi, por ndërkohë edhe kanë rritur sfidat, si edhe rreziqet e mashtrimeve financiare. Shifrat tregojnë se vitet e fundit numri i bizneseve, por edhe qytetarëve që janë dëmtuar, duke rënë pre e mashtrimeve dhe hakersave, është rritur ndjeshëm. Për këtë rast, bëhet gjithnjë e më shumë e nevojshme, që paralelisht me investimet për rritjen e sigurisë së sistemeve, të investohet gjithashtu edhe në rritjen e edukimit dhe njohurive financiare.
Në këtë kuadër, Shoqata Shqiptare e Bankave (AAB), ka nisur vitin e kaluar një fushatë sensibilizuese, e cila është ndalur së fundmi në universitetin Epoka.
Për të informuar dhe ndihmuar më shumë të rinjtë të mbrohen nga rreziqet online, ekspertët më të mirë të Fibank Albania dhanë disa këshilla praktika, si edhe ndanë njohuritë e tyre.
Fatjon Muça, Drejtor i Departamentit të Sigurisë së Informacionit në Fibank Albania dhe anëtar i Komitetit të Sigurisë Kibernetike në AAB, së bashku me Lorenc Tabaku, Drejtor i Departamentit të IT në Fibank Albania dhe anëtar i Komitetit të IT në AAB, trajtuan rreziqet e mashtrimeve online, strategjitë për të mbrojtur kursimet dhe të dhënat personale, si dhe praktikat më të mira për një banking të sigurt.
Mbi 100 studentë të Financës dhe Informatikës së Biznesit morën pjesë dhe diskutuan mbi sfidat dhe zgjidhjet për sigurinë financiare në epokën digjitale.
Ky leksion ishte pjesë e nismës globale të OECD, me temën e këtij viti: “Mendoni para se të veproni – zgjuarsi financiare për një të ardhme të sigurt!”. Mashtrimet financiare dhe sulmet kibernetike janë një kërcënim real, sidomos në një botë ku gjithçka po digjitalizohet. Ndaj të gjithë duhet të informohemi më shumë dhe duhet të tregojmë sa më shumë kujdes ndaj mesazheve që na vijnë, si edhe ruajtjes së informacioneve dhe të dhënave tona bankare. /ekofin.al
