Ministri i Financave, Petrit Malaj shprehu sot bindjen se brenda muajit maj do të jenë finalizuar të gjitha aktet nënligjore në kuadër të Paqes Fiskale.
Në një prononcim për mediet pas mbledhjes së qeverisë, Malaj u shpreh se aktet nënligjore janë drejt fazës finale.
“Besoj se shumë shpejt do të dalim me aktet nënligjore dhe udhëzimet përkatëse për sa i përket Paqes Fiskale si dhe fshirjes së detyrimeve. Ka qenë një periudhë ku ne kemi diskutuar dhe negociuar me organizmat ndërkombëtarë për aktet nënligjore, ashtu siç bëmë edhe për ligjet në vetvete. Kështu që shumë shpejt do të dalim me aktet nënligjore”, tha Malaj.
Ministri u shpreh besimplotë se brenda muajit maj do të jenë mbyllur të gjitha proceset respektive.
“Për pjesën e fshirjes së detyrimeve tatimore dhe doganore patjetër që marrëveshjet janë parashikuar në ligj. Aktet nënligjore dhe udhëzimet janë më tepër pjesë e sqarimit se si do të bëhet procedura dhe patjetër që do të përfitojnë të gjithë tatimpaguesit që plotësojnë kriteret e faljes së detyrimeve”, tha Malaj.
