Së fundmi, Shqipëria është kthyer në një nga destinacionet më të përfolura turistike në Evropë – dhe jo pa arsye. Në brendësi të vendit, Alpet Shqiptare, të njohura edhe si “Bjeshkët e Nemuna”, ofrojnë terrene ideale për ecje malore dhe aventura natyrore, sipas “Lonely Planet”.
Ndërkohë, përgjatë vijës së gjatë bregdetare, turistët mund të gjejnë plazhe të famshme të Adriatikut dhe Jonit me ujëra të kristalta, si edhe qytete historike me trashëgimi të pasur arkitekturore.
Një tjetër avantazh është kostoja: Shqipëria mbetet dukshëm më e lirë se destinacionet fqinje si Kroaci, Greqi dhe Itali.
Kur është koha më e mirë për të vizituar Shqipërinë?
Ksamili dhe Saranda, dy nga destinacionet më të njohura bregdetare, mbushen me turistë nga qershori deri në shtator.
Për ata që kërkojnë më shumë qetësi, maji është një zgjedhje e mirë, ndonëse deti mbetet ende i freskët.
Periudha më e rekomanduar konsiderohet shtator–dhjetor, kur temperaturat janë ende të favorshme dhe numri i vizitorëve bie ndjeshëm.
Gjatë dimrit, rekomandohet kryesisht vizita në Tiranë, ku restorantet dhe baret krijojnë nje atmosferë të ngrohtë.
Një prej vendeve më të veçanta është bar “Komiteti”, i njohur për llojet e ndryshme të rakisë tradicionale.
Sa kohë duhet të qëndroni?
Një fundjavë mjafton për të vizituar Rivierën Shqiptare, duke fluturuar drejt Korfuzit dhe më pas me traget drejt Sarandës.
Një alternativë tjetër është qëndrimi në Tiranë për të eksploruar gastronominë dhe historinë e kryeqytetit.
Për një udhëtim më të plotë, një javë është e mjaftueshme për të përfshirë Tiranën, bregdetin dhe qytetet historike si Berati dhe Gjirokastra.
Për ecje në veri ose përdorim të transportit publik nevojitet më shumë kohë, pasi autobusët ndërqytetës shpesh janë të ngadaltë.
Si të udhëtoni në Shqipëri?
Shqipëria ka një aeroport ndërkombëtar kryesor, Aeroporti Ndërkombëtar i Tiranës. Për rivierën jugore, shumë turistë zgjedhin të fluturojnë në Korfuz dhe më pas të marrin tragetin drejt bregdetit shqiptar.
Transporti i brendshëm mund të jetë sfidues. Furgonët që lidhin qytetet nuk kanë orare të rregullta. Marrja e një makine me qira është më praktike, sidomos për të eksploruar zona më pak të aksesueshme, megjithëse drejtimi kërkon kujdes për shkak të trafikut.
Çfarë nuk duhet humbur?
Bregdeti shqiptar
Plazhet e Shqipërisë janë ndër atraksionet kryesore. Ksamili mbetet më i famshmi, por gjatë verës është shumë i mbipopulluar. Për më shumë qetësi, rekomandohen plazhet rreth Himarës dhe Dhërmiut.
Vizitorët në Ksamil nuk duhet të humbasin Butrintin, qytetin antik greko-romak i mbrojtur nga UNESCO.
Jeta e natës në Bllok
Blloku, dikur zonë e mbyllur për elitën komuniste, sot është qendra më dinamike e kryeqytetit.
Kafenetë moderne, baret dhe klubet e bëjnë një pikë të domosdoshme për vizitorët. Një prej vendeve më të pëlqyera është “Radio Bar”.
Berati dhe Gjirokastra
Qytetet muze të UNESCO-s janë ndër perlat kulturore të vendit. Në Berat, turistët mund të eksplorojnë kalanë dhe rrugicat karakteristike prej guri, ndërsa panorama më e mirë e qytetit shihet nga lumi Osum.
Në Gjirokastër, rrugët e pjerrëta, shtëpitë tradicionale me çati guri dhe kalaja e madhe ofrojnë një përvojë autentike. Në qytet mund të vizitohen edhe bunkerë të periudhës komuniste.
Destinacioni i preferuar: veriu malor
Veriu i Shqipërisë konsiderohet nga shumë vizitorë pjesa më mbresëlënëse e vendit. Shkodra është një bazë ideale për eksplorim, falë atmosferës studentore dhe përdorimit të gjerë të biçikletave.
Në vetëm tri ditë mund të organizohet një itinerar që përfshin tragetin drejt Valbonës, ecje në shtegun “Majat e Ballkanit” dhe një vizitë në Syrin e Kaltër të Thethit.
Sa kushton Shqipëria?
Shumica e bizneseve në Shqipëri ende preferojnë pagesat cash. Kartat bankare nuk pranohen gjerësisht, sidomos jashtë qyteteve kryesore.
Çmime orientuese:
- Hostel: rreth 1,500 lekë/nata
- Dhomë dyshe: rreth 5,000 lekë/nata
- Apartament: rreth 5,000 lekë/nata
- Biletë autobusi në Tiranë: 40 lekë
- Udhëtim Sarandë–Tiranë: rreth 1,600 lekë
- Kafe: 100–200 lekë
- Sanduiç: rreth 600 lekë
- Darkë për dy persona: rreth 2,000 lekë
- Birrë: rreth 300 lekë
A është e sigurt Shqipëria?
Pavarësisht reputacionit të vjetër, Shqipëria konsiderohet një destinacion i sigurt për turistët. Rastet e vjedhjeve janë të rralla dhe kriminaliteti që lidhet me grupe shqiptare jashtë vendit nuk reflektohet në përvojën e zakonshme të turistëve.
Besimi dhe kultura
Shumica e shqiptarëve identifikohen si myslimanë, megjithëse shprehja publike e fesë është zakonisht e kufizuar.
Krahas xhamive, vendi ka edhe shumë kisha. Në zona jashtë Tiranës dhe plazheve, rekomandohet veshje më e përmbajtur, sidomos gjatë vizitës në objekte fetare./ATSH
