Mbi 453 milionë euro detyrime tatimore të papaguara janë fshirë ose shuar në kuadër të zbatimit të Ligjit të Faljes. Nga kjo masë kanë përfituar gjithsej 220,455 tatimpagues, ndërsa pjesën më të madhe të detyrimeve të fshira e zënë Tatimi mbi Vlerën e Shtuar (TVSH) dhe Tatimi mbi Fitimin.
Të dhënat e publikuara nga Administrata Tatimore tregojnë se vlera totale e detyrimeve të fshira ose të shuara ka arritur në 453,041,037 euro, duke reflektuar përmasat e detyrimeve të akumuluara ndër vite nga bizneset dhe individët ndaj administratës fiskale.
Sipas të dhënave, peshën më të madhe në vlerën totale të detyrimeve të fshira e zë TVSH-ja, me rreth 140.5 milionë euro, nga e cila kanë përfituar 13,227 tatimpagues.
Në vendin e dytë renditet Tatimi mbi Fitimin, me 138.1 milionë euro detyrime të fshira ose të shuara dhe 16,358 tatimpagues përfitues.
Të dyja këto kategori përfaqësojnë së bashku rreth 278.6 milionë euro, ose 61.5% të vlerës totale të detyrimeve të përfshira në falje.
Një tjetër kategori me peshë të konsiderueshme është ajo e kontributeve të sigurimeve shoqërore dhe shëndetësore. Sipas Administratës Tatimore, në këtë zë janë fshirë ose shuar rreth 67 milionë euro detyrime, nga të cilat kanë përfituar 63,521 tatimpagues.
Ndërkohë, në kategorinë e tatimit të mbajtur në burim rezultojnë 26.8 milionë euro detyrime të fshira ose të shuara, me 18,615 tatimpagues përfitues.
Për tatimin e thjeshtuar mbi fitimin, vlera e detyrimeve të përfshira në falje arrin në 6.34 milionë euro, ndërsa numri i tatimpaguesve përfitues është 48,146.
Në kategorinë e tatimit mbi të ardhurat individuale janë fshirë ose shuar rreth 1.71 milionë euro detyrime, nga të cilat kanë përfituar 27,494 tatimpagues.
Një peshë të rëndësishme zë edhe grupi i detyrimeve të tjera tatimore, me një vlerë prej rreth 72.6 milionë eurosh dhe 33,094 tatimpagues përfitues.
Fshirja ose shuarja e detyrimeve tatimore përmes Ligjit të Faljes përfaqëson një ndërhyrje të rëndësishme në stokun e detyrimeve të papaguara ndaj administratës fiskale.
Masa synon të lehtësojë barrën e detyrimeve të akumuluara për tatimpaguesit që plotësojnë kushtet ligjore, si dhe të mundësojë pastrimin e regjistrave tatimorë nga detyrimet që përfshihen në skemën e faljes.
Megjithatë, 453 milionë eurot e fshira ose të shuara nuk përfaqësojnë të ardhura të arkëtuara nga buxheti i shtetit, por detyrime që janë hequr nga evidencat fiskale sipas dispozitave përkatëse.
Nga ana tjetër, përmasat e kësaj shume nxjerrin në pah edhe nivelin e lartë të detyrimeve të papaguara që ishin akumuluar në sistemin tatimor.
Vetëm detyrimet që lidhen me TVSH-në, Tatimin mbi Fitimin dhe kontributet e sigurimeve shoqërore e shëndetësore arrijnë në rreth 345.6 milionë euro, ose mbi 76% të shumës totale të fshirë ose të shuar.
Administrata Tatimore bën të ditur se procesi i faljes së detyrimeve tatimore vijon në përputhje me kushtet e përcaktuara në ligj./ekofin.al
