Enti Rregullator i Energjisë ka licencuar shoqërinë “Karavasta Solar” për prodhimin e energjisë elektrike, si pjesë e projektit në Parkun e Karavastasë. Por edhe pse në vendimin e Bordit të ERE-s të datës 9 maj 2022 është marrë vendimi për licencimin, shoqërisë i është lënë kohë të dorëzojë brenda datës 20 qershor qëndrimin e Agjencisë Kombëtare të Mjedisit, në lidhje me informacionin kadastral të Deklaratës Mjedisore për zhvillimin e projektit të Karavastasë.
“Në lidhje me konstatimin se zona kadastrale e cituar në Deklaratën Mjedisore të Agjencisë Kombëtare të Mjedisit (AKM) nuk përputhet me zonën kadastrale të cituar, në dokumentacionin pronësor të depozituar nga ana e shoqërisë për qëllime të këtij aplikimi, rezulton se shoqëria i ka dërguar shkresë AKM-së, më datë 08.04.2022, ku i është kërkuar korrigjimi i të dhënave kadastrale të Deklaratës Mjedisore. Në këto rrethana vlerësohet që t’i lihet kusht shoqërisë depozitimi në ERE i përgjigjes së AKM-së, brenda datës 20.06.2022, duke marrë në konsideratë afatin prej 45 ditëve pune (duke filluar ky afat nga data e depozitimit të shkresës), brenda të cilit AKM shprehet në lidhje me aplikimet, dhe duke i lënë 5 ditë kohë shoqërisë për të depozituar këtë dokument në ERE”, thuhet në vendim.
“Karavasta Solar” është kompania shqiptare, pjesë e kompanisë franceze “Voltalia” e cila u shpall fituese dy vjet më parë për projektin fotovoltaik. Në maj të vitit 2020, kjo shoqëri ofroi çmimin 24,89 euro për megavat në ankandin ndërkombëtar. Parashikohet që kompania të realizojë një investim me vlerë deri në 100 milionë euro për ndërtimin e parkut energjetik. Autoritetet shqiptare parashikojnë që Parku i Karavastasë të jetë parku energjetik më i madh me energji solare në Ballkan, i cili do të prodhojë 140 megavat energji.
