Qeveria ndryshon sërish rregullat për ndërtimin në zonat aeroportuale, pas 2 muajve nga hyrja në fuqi e vendimit fillestar.
Në mbledhjen e sotme qeveria ka rishikuar rregullat e vendosura në Vkm-në nr. 784, datë 18.12.2024.
Me ndryshimin e ri, zona e mbrojtur e aeroportit, ndryshon nga rrezja prej 15 km nga pika e referimit sipas Vkm-së së mëparshme, në një ndarje më të detajuar zonash:
në zonën “A”, e cila shtrihet në një rreze prej 2 (dy) kilometrash nga pika e referimit të aeroportit;
në zonën “B”, e cila shtrihet në një rreze prej 2 (dy) kilometrash nga përfundimi i zonës “A”;
dhe zonën “C” është zona e cila shtrihet në një rreze prej 11 (njëmbëdhjetë) kilometrash nga përfundimi i zonës “B”.
Tashmë lejet për zhvillim apo ndërtim në Zonën A dhe B për objektet jo më shumë se 15 kate lartësi nga toka dhe në zonën C për objektet me 30 metra lartësi nga toka ose më shumë merren pranë Këshillit Kombëtar të Territorit dhe Ujit.
Vendimi kufizon kompetencën e Autoritetit Civil të Aviacionit, duke saktësuar se KKTU-ja dhe njësitë e vetëqeverisjes vendore, sipas rastit, për çdo objekt apo strukturë të planifikuar për ndërtim apo instalim në zonat e mbrojtura “A” dhe “B” të aeroportit, përpara dhënies së lejes duhet që të marrin miratimin nga AAC-ja.
Ndërsa në zonën “C”, pra 11 km në rrezen e zonës së mbrojtur miratimi nga AAC-ja jepet vetëm për objektet që janë 30 metra lartësi nga toka ose më shumë, për të cilat leja jepet nga KKTU-ja.
Miratimi i AAC-së jepet vetëm për zhvillimin apo ndërtimin e objekteve që sjellin pengesa për operimet ajrore.
Shtesat dhe ndryshimet e bëra me këtë vendim i shtrijnë efektet që nga data 23.12.2024, që nënkupton ndryshimin e të gjitha rregullave të miratuara me hyrjen në fuqi për herë të parë të vendimit. /ekofin.al
