Qytetarët që kanë legalizuar banesat e tyre, por nuk disponojnë faturat për pagesën e parcelës ndërtimore, mund t’i sigurojnë këto dokumente përmes një aplikimi online, pa asnjë tarifë shërbimi.
Kadastra ka publikuar procedurën që duhet të ndjekin qytetarët dhe bizneset për t’u pajisur me faturat përkatëse, duke shmangur nevojën për paraqitje fizike pranë zyrave vendore.
Shërbimi ofrohet përmes portalit qeveritar e-Albania dhe u vjen në ndihmë veçanërisht pronarëve që kanë përfunduar procedurën e legalizimit, por nuk kanë në dispozicion dokumentacionin e nevojshëm për pagesën e parcelës ndërtimore.
Sipas udhëzimeve të ASHK-së, të interesuarit duhet fillimisht të identifikohen në portalin e-Albania, në cilësinë e qytetarit ose biznesit.
Më pas, në hapësirën e kërkimit duhet të përzgjedhin shërbimin “Kërkesë për pajisje me faturat e parcelës ndërtimore” dhe të klikojnë butonin “Përdor”.
Në vijim, aplikanti duhet të krijojë një aplikim të ri dhe të përcaktojë nëse e paraqet kërkesën personalisht apo në cilësinë e përfaqësuesit.
Një nga hapat kryesorë të procedurës është ngarkimi i dokumentacionit që provon statusin e pronës. Konkretisht, kërkohet një kopje e vendimit të legalizimit ose një kopje e vendimit të Këshillit të Ministrave për kompensimin financiar të pronarëve që preken nga ndërtimet e legalizuara.
Për qytetarët që përfitojnë nga skemat lehtësuese, kërkohet gjithashtu dokumenti që vërteton kategorinë përkatëse të përfitimit.
Pas plotësimit të dokumentacionit, aplikanti duhet të përzgjedhë Drejtorinë Vendore të ASHK-së që administron territorin ku ndodhet prona dhe të përfundojë procedurën duke klikuar butonin “Dërgo”.
Një element i rëndësishëm i këtij shërbimi është se e gjithë procedura realizohet online, pa qenë e nevojshme paraqitja fizike në sportelet e institucionit.
Pas shqyrtimit të kërkesës, përgjigjja i vihet në dispozicion aplikantit në mënyrë elektronike, e pajisur me vulë digjitale.
Dokumenti mund të gjendet në seksionin “Dokumentet e mia” në portalin e-Albania, nga ku qytetari mund ta shkarkojë në çdo kohë.
ASHK sqaron se aplikimi për pajisjen me faturat e parcelës ndërtimore ofrohet pa pagesë. Megjithatë, duhet bërë dallimi ndërmjet tarifës së shërbimit administrativ dhe detyrimit financiar që lidhet me vetë parcelën ndërtimore.
Fakti që aplikimi është falas nuk nënkupton përjashtimin nga pagesa e parcelës, në rastet kur ky detyrim ekziston sipas legjislacionit në fuqi.
Për qytetarët që përfitojnë nga skemat lehtësuese, dokumentacioni përkatës shërben për të vërtetuar kategorinë e përfitimit gjatë trajtimit të kërkesës. /ekofin.al
