Sa herë i kemi thënë një fëmije: “Kjo kushton shumë”?
Sa herë e kemi dëgjuar të pyesë: “Pse nuk e blejmë tani?”
Dhe sa shpesh, në vend që ta kthejmë këtë pyetje në një bisedë të thjeshtë për paranë, kursimin apo zgjedhjet, e mbyllim me një përgjigje të shpejtë: “Sepse jo”?
Në fakt, aty fillon edukimi financiar.
Jo në një bankë, në një kontratë kredie, apo në momentin kur një i rritur duhet të marrë vendime të mëdha për jetën, shtëpinë, biznesin apo të ardhmen. Edukimi financiar fillon shumë më herët, në bisedat e vogla të përditshme, në mënyrën si një fëmijë kupton se paratë nuk janë thjesht kartëmonedha, por rezultat pune, zgjedhjesh, prioritetesh dhe përgjegjësie.
Për OTP Bank Albania, edukimi financiar nuk është vetëm një temë komunikimi. Ai është një pjesë e rëndësishme e përgjegjësisë që një institucion financiar ka ndaj shoqërisë, por edhe një çështje besimi, sepse ai ndërtohet kur institucionet marrin pjesë në jetën e komunitetit, jo vetëm si ofrues shërbimesh, por si partnerë në edukim, zhvillim dhe përgjegjësi sociale. Dhe një shoqëri që kupton më mirë paranë, kursimin, planifikimin dhe kujdesin ndaj vendimeve financiare, është një shoqëri më e përgatitur, më e mbrojtur dhe më e pavarur.
Pikërisht duke ndjekur këtë parim, OTP Bank Albania ka mbështetur prodhimin e librit “Paraja Magjike”, me autore, gazetaren Deada Hyka, një botim i dedikuar për fëmijët e moshës 8–10 vjeç, i cili i njeh ata me konceptet bazë të parasë në një gjuhë të thjeshtë, të ngrohtë dhe të përshtatshme për moshën e tyre. Libri u mëson fëmijëve çfarë është paraja, pse është e rëndësishme të kursejmë, si të mendojmë para se të shpenzojmë dhe pse vendimet e vogla financiare krijojnë zakone që na shoqërojnë gjatë gjithë jetës.
Aktiviteti për promovimin e këtij libri, i organizuar nga OTP Bank Albania, ishte më shumë një moment për të folur për një temë që shpesh lihet për më vonë: marrëdhënia e fëmijëve me paranë.
Nëse fëmijët mësojnë herët të dallojnë mes dëshirës dhe nevojës, mes shpenzimit të menjëhershëm dhe kursimit për diçka më të rëndësishme, ata rriten me një aftësi që nuk u shërben vetëm në ekonomi. U shërben në jetë.
Edukimi financiar nuk është t’i mësosh fëmijët të bëhen “të kujdesshëm” në kuptimin e ngushtë të fjalës. Ai është më tepër i lidhur me mënyrën se si duhet të mendojnë, të zgjedhin, të kuptojnë se çdo vendim ka një pasojë. Të mos kenë frikë nga paraja, por as ta trajtojnë atë si diçka pa kufi. Të kuptojnë se kursimi nuk është mungesë, por planifikim. Se dëshira për të pasur diçka sot, mund të bashkëjetojë me durimin për ta arritur atë nesër.
Në këtë nismë, mbështetja për edukimin financiar lidhet edhe me një kauzë njerëzore. Të ardhurat nga shitja e librit “Paraja Magjike” do të shkojnë për fëmijët e Fshatit SOS, duke e kthyer çdo kopje të blerë në më shumë sesa një libër: në një kontribut konkret për fëmijë që kanë nevojë për kujdes, mbështetje dhe mundësi.
Kjo është edhe arsyeja pse një nismë e tillë ka vlerë të dyfishtë. Nga njëra anë, i jep fëmijëve një mjet edukues për të kuptuar botën e parasë, por edhe krijon një formë solidariteti ku komuniteti kontribuon për ata që kanë më shumë nevojë.
Në fund, ndoshta “Paraja Magjike” nuk është magjike sepse flet për paranë. Është magjike, sepse hap një bisedë që fëmijët duhet ta dëgjojnë herët dhe të rriturit duhet ta bëjnë më shpesh.
Sepse një fëmijë që mëson të kursejë sot, nesër mund të jetë një i rritur që di të vendosë më mirë.
Dhe një shoqëri që investon në edukimin financiar të fëmijëve, investon në një të ardhme më të sigurt për të gjithë.
