Qeveria e Kroacisë ka hapur një thirrje publike për dhënien e subvencioneve për blerjen e automjeteve elektrike të destinuara për përdorim në shërbimet e taksive, shpërndarjes dhe car-sharing.
Kjo është thirrja e parë publike në Kroaci për bashkëfinancimin e blerjes së automjeteve elektrike për shërbimet e taksive, shpërndarjes dhe ndarjes së makinave (car-sharing).
Programi për ndarjen e fondeve të pakthyeshme u publikua nga Ministria Kroate e Mjedisit dhe Tranzicionit të Gjelbër. Thirrja është pjesë e një mekanizmi për investime në transportin rrugor me zero emetime.
Grante përmes Fondit të Modernizimit të Bashkimit Evropian
Nga i gjithë paketi prej 45 milionë eurosh, shoferët e taksive përfitojnë 22 milionë euro, ndërsa 20 milionë euro janë të dedikuara për automjetet e shpërndarjes, dhe 3 milionë euro janë parashikuar për ofruesit e shërbimeve të car-sharing, sipas thirrjes publike.
Ministria synon të mbështesë blerjen e automjeteve me zero emetime – automjete elektrike të kategorive M1 ose N1, me objektivin për të arritur një reduktim të gazeve serrë në sektorin e transportit me 20.99% deri në vitin 2030, në krahasim me nivelin e vitit 2005.
Në kategorinë M1 përfshihen automjetet e pasagjerëve me maksimumi nëntë vende, ndërsa N1 janë automjete të lehta komerciale me peshë maksimale të lejuar 3.5 tonë. Shuma maksimale e subvencionit për automjet është 9,000 euro, që do të thotë se thirrja pritet të bashkëfinancojë blerjen e të paktën 5,000 automjeteve elektrike.
Dorëzimi i aplikimeve fillon më 15 janar 2026 dhe zgjat deri sa të shterojnë fondet, ose më së voni deri më 30 shtator 2026.
Tre muaj më parë, në Maqedoninë e Veriut u lançua një program subvencionesh për shërbimet e taksive.
Ministria e Mjedisit dhe Planifikimit Hapësinor dhe një shoqatë e taksistëve po zbatojnë një projekt për subvencionimin e 200 automjeteve elektrike. Nisma është pjesë e përpjekjeve për transport urban më të pastër, më të qetë dhe më efikas për qytetarët e Shkupit dhe të gjithë vendit. Ai është një nga qytetet me ajrin më të ndotur në botë./Përshtati nga Balkan Green Energy News, ekofin.al
