Kreditë me probleme në banka i janë rikthyer rënies në muajin qershor. Të dhënat më të fundit nga Banka e Shqipërisë tregojnë se norma e kredive me probleme ka arritur në nivelet më të ulëta historike.
Konkretisht, niveli i kredive me probleme zbriti në 4.01% nga 4.12% që ishte në muajin maj, shifër e cila përbën nivelin më të ulët të kredive të këqija në bankat tregtare që prej vitit 2008. Kjo tregon se shëndeti i bankave është përmirësuar, pra është rritur cilësia e portofolit të kredisë, për shkak edhe të rritjes që ka pasur kredia në tërësi.
Sipas të dhënave nga Banka Qendrore, në muajin qershor, totali i kredisë në banka pësoi një rritje prej 12.1% duke kapur vlerën e 892.6 miliardë lekëve.
Por si ka lëvizur raporti i kredive me probleme që nga fillimi i vitit?
Viti 2025 nisi me një nivel prej 4.12% të kredive me probleme, nivel i cili vijoi të përmirësohej në muajt shkurt dhe mars me 4.06% dhe 4.02% përkatësisht. Ndërkohë, raporti i kredive me probleme ndaj totalit të huave do të rritej sërish në prill dhe maj, duke arritur në nivele prej 4.03% dhe 4.12%.
Kreditë me probleme janë ato në të cilat këstet nuk paguhen në kohë nga kredimarrësi ose nuk paguhen në shumën e duhur. Rënia e kredive me probleme është tregues i rritjes së kredive të rregullta, të cilat nuk kanë asnjë problematikë në afatin dhe shumën e shlyerjes.
Një kredi bëhet me probleme kur ka dyshime se huamarrësi nuk ka gjasa ta shlyejë kredinë, ose nëse kanë kaluar më shumë se 90 ditë pa i paguar huamarrësit këstet e rënë dakord. Kjo mund të ndodhë kur një individ humbet punën dhe për këtë arsye nuk mund ta shlyejë hipotekën e tij siç është rënë dakord, ose kur një kompani përjeton vështirësi financiare.
Kjo sjell gjithmonë kosto për bankën, kështu që ato duhet ta mbajnë nivelin e kredive të këqija në minimum. /Scan.tv
