Kredia për individët po vijon rritjen edhe këtë vit, duke u konfirmuar si segmenti me rritjen më të qëndrueshme të huasë gjatë viteve të fundit.
Banka e Shqipërisë bën të ditur se, gjatë 4-muajve të parë të këtij vitit kredia e re për individë arriti në 26.6 miliardë lekë.
Krahasuar me të njëjtën periudhë, të vitit të kaluar kredia për individët u rrit me 22.5%.
Kredia për blerjen e pasurive të paluajtshme kryeson për rritjen e huadhënies tek individët dhe këtë vit, teksa paralelisht në trend në rritje është edhe kredia konsumatore.
Sipas BSH-së, në fund të muajit prill 2022, portofoli i kredisë për ekonominë arriti vlerën e 690 miliardë lekëve, në rritje vjetore me 12.1%.
Ritmet më të larta të rritjes po regjistrohen në segmentin e kredisë për individë, ku portofoli i kredisë është zmadhuar me 14%, ndërsa në segmentin e bizneseve rritja është 9.2% krahasuar me të njëjtën periudhë të vitit të kaluar.
