Institucionet mikrofinanciare vijuan të zgjerojnë aktivitetin financiare edhe përgjatë tremujorit të parë të këtij viti.
Sipas bilancit sektorial të shoqërive të kursim-kreditit, publikuar nga Banka e Shqipërisë, aktivet e shoqërive në këtë tremujor arritën në 13 miliardë e 758 milionë lekë, me një rritje prej 230 milionë lekësh krahasuar me tremujorin e mëparshëm.
Aktualisht në Shqipëri operojnë 16 shoqëri kursim-krediti dhe 1 union. Shoqëritë e kursim-kreditit janë krijuar mbi bazën e organizimit vullnetar të anëtarëve, të cilët depozitojnë paratë e tyre në shoqëri, për t’u përdorur prej tyre për dhënie kredie vetëm anëtarëve të shoqërisë së kursim-kreditit.
Kreditë përbëjnë pjesën kryesore të portofolit të aktiveve të shoqërive. Vlera e kredive të akorduara arrin në 9 miliardë e 577 milionë lekë, në 3-mujorin e parë 2022, duke njohur rritje me 238 milionë lekë krahasuar me tremujorin paraardhës.
Shoqëritë e kursim-kreditit janë të rëndësishme kryesisht për të financuar fermerët apo bizneset e vogla, veçanërisht në zonat rurale.
