Komisioni i Konkurrencës vendosi hapjen e procedurës së hetimit të thelluar ndaj kompanisë Vodafone Albania, në tregun e shërbimeve celulare.
Sipas Autoritetit të Konkurrencës, vendimi erdhi pas një ankese të depozituar pranë tij.
“Komisioni i Konkurrencës, me qëllim, verifikimin fillestar të pretendimeve të ngritura nga ankuesi, hapi procedurën e hetimit paraprak ndaj ndërmarrjes Vodafone Albania mbi abuzimin e pozitës së saj dominuese në tregun e shërbimeve celulare: tregu me shumicë i terminimit të thirrjeve ndërkombëtare”, bën të ditur Autoriteti i Konkurrencës përmes një njoftimi për mediet.
Ndërmarrja Vodafone Albania është një ndërmarrje e autorizuar si ofrues i rrjeteve/ shërbimeve të komunikimeve elektronike publike dhe e autorizuar për të tranzituar trafik ndërkombëtar brenda Shqipërisë sipas parashikimeve të ligjit shqiptar në fuqi.
Tregu i terminimit të thirrjeve ndërkombëtare, në të cilin Vodafone Albania ka pozitë dominuese në masën 100 %, nuk rregullohet nga AKEP, duke përfshirë dhe tarifat e terminimit.
“Referuar analizës së konkurrencës ndaj Vodafone Albania në tregun me shumicë të terminimit të thirrjeve ndërkombëtar, rezulton se kjo ndërmarrje mund të ketë zbatuar kushte të pabarabarta për veprime tregtare të njëjta me palët, duke i vendosur ato në gjendje të pafavorshme konkurrence. Kjo sjellje e cila, në rast se vërtetohet, mund të përbëjë abuzim me pozitën dominuese në kuptim të ligjit “Për mbrojtjen e konkurrencës”, vlerësohet të ketë nevojë për verifikime më të thelluara nga ana e Autoriteti të Konkurrencës”, thuhet në njoftimin e AK-së.
