Gushti 2025 solli një rritje të ndjeshme të trafikut ajror në Europë, sipas të dhënave të publikuara nga Airports Council International (ACI Europe). Aeroporti Ndërkombëtar i Tiranës (TIA) shënoi një rritje prej 13.5% të pasagjerëve krahasuar me gushtin 2024, duke u renditur në mesin e aeroporteve me performancën më të mirë në kategorinë e “aeorporteve të mëdhenj”.
Në këtë kategori, diferencat janë të dukshme: Tel Aviv (Izrael): +38.1% (rekordi në këtë kategori); Krakova (Poloni): +19.6%. Adana (Turqi): +19.2%. Varshava (Poloni): +15.6% dhe aeroporti i Tiranës (Shqipëri): +13.5%.
Krahasuar me fqinjët ballkanikë, Tirana performon dukshëm më mirë se Athina (+6.8%) dhe Stambolli (+6.8%), ndërkohë që ka lënë pas tashmë Beogradin, Shkupin, Prishtinën, Zagrebin e Podgoricën, duke dëshmuar një dinamikë më të fortë në rritjen e kërkesës për udhëtime drejt dhe nga Shqipëria.
Krahasuar me mesataren e BE-së dhe performancën e aeroporteve kryesore të Europës Perëndimore (Frankfurt +4.1%, Paris CDG nuk përfshihet në Top 5), Tirana rezulton ndër rritjet më të shpejta.
Ndër aeroportet e mëdha të listuara nga ACI, hashtagu #TIA tregon rritjen më të lartë nga viti në vit krahasuar me vitin 2019 me +250%, kundrejt një mesatareje evropiane prej 5.2%.
Shifrat e gushtit 2025 konfirmojnë se Aeroporti i Tiranës është një histori suksesi në rritje, duke reflektuar rritjen e fuqishme të turizmit në Shqipëri, zgjerimin e linjave low-cost dhe lidhjet e reja ajrore. Me këtë performancë, Tirana jo vetëm që kapërcen fqinjët, por vendoset përkrah aeroportesh të mëdha evropiane, duke u shndërruar në një nga destinacionet ajrore më konkurruese në rajon. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
