Thatësira dhe rënia e prodhimit vendas kanë rritur ndjeshëm sasinë e energjisë së importuar nga Korporata Elektroenergjetike Shqiptare (KESH) për këtë javë. Ekofin.al analizoi shifrat e importit të energjisë, shoqëruar me çmimet e importit, për muajin qershor, kur edhe u rikthye nevoja për të importuar energji. Rezulton se nga 33,000 MWh energji e importuar në javën e parë të këtij muaji, kërkesa është dyfishuar për javën e fundit të qershorit në 70,700 MWh të blera nga KESH përmes dy loteve.
Gjithashtu, edhe çmimi është rritur ndjeshëm. Në lotin e parë KESH bleu 58,800 MWh energji elektrike me çmim të ponderuar 133,22 euro/MWh. Çmimi më i lartë i kontraktuar ishte 136 euro/MWh, ndërsa çmimi më i ulët i kontraktuar ishte 116,50 euro/MWH. Ndërsa në lotin e dytë, sasi prej 11,970 MWh u kontraktua me një çmim të ponderuar 109,25 euro/MWh, ku më i larti ishte 118,50 euro/MWh dhe më i ulëti 106 euro/MWh.
Në këtë mënyrë, bazuar në mesataren e ponderuar të çmimit, KESH ka shpenzuar rreth 9.1 milionë euro për blerje energjie vetëm për këtë javë.
Në fillim të këtij muaji çmimi mesatar i ponderuar ishte 106.81 euro, sipas të dhënave të publikuara nga korporata. Konstatohet një rritje e çmimit, gjë që është tendecë në muajt e verës, kur edhe kërkesa për energji rritet. Parashikimet janë që muaji korrik do të jetë me temperatura edhe më të larta sesa qershori, me më shumë thatësirë. Kjo do të rrisë më tej konsumin, e për pasojë importin, si edhe kostot e KESH për të siguruar energji. /ekofin.al
Artikull i Ekofin.al
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke
cituar “Ekofin.al”, shoqëruar me linkun e artikullit origjinal.
