Rritja e fundit e pagave në sektorin publik pritet ta çojë edhe zyrtarisht, në të dhënat më të afërta të INSTAT, pagën mesatare në shtet në mbi 1 mijë euro. Por ndërkohë sa i përket punësimit, sidomos rritja e sektorit të turizmit, ka sjellë një fenomen interesant sa i përket pagave.
Në këtë mënyrë, edhe për shkak të kërkesës së lartë për të punësuar në sektorin e shërbimeve, rezulton që ata që në zhargonin e përditshëm konsiderohet edhe si “krah pune”, të paguhen edhe më shumë sesa punonjësit e zyrave.
Kështu, kërkesat në rritje për banakierë, kamarierë, kuzhinierë apo baristë në zonat bregdetare ka bërë që ata të paguhen mesatarisht 1300-2000 euro në muaj.
Në anën tjetër, bumi i sektorit të ndërtimit ka rritur kërkesën dhe automatikisht ka shtuar pagesat për punëtorët e ndërtimit. Kjo ka bërë që kompanitë e ndërtimit të rrisin në 70-80 euro në ditë pagesat për ustallarët, që janë gjithnjë e më të paktë në numër, duke bërë që paga e tyre mujore të shkojë diku te 1700 euro në muaj.
Dhe zanatçinjtë, gjithnjë e më të paktë në numër, po paguhen më mirë, me pagesa ditore që variojnë në 60 apo 70 euro dhe mesatarisht 1500 euro në muaj. Në anën tjetër, siç raporton INSTAT në të dhënat e punësimit për vitin 2023, menaxherët, drejtuesit nuk po paguhen më shumë se 1200 euro në muaj, gjë që ka sjellë një lloj çbalancimi në tregun e punës përkundrejt punonjësve të krahut.
