Qeveria miratoi sot disa projektligje të rëndësishme në fushën e ekonomisë dhe financës.
Ministrja e Financave dhe Ekonomisë, Delina Ibrahimaj tha se, “ligji për Ndërmarrjet e Vogla dhe të Mesme, përcakton kategorizimin e ndërmarrjeve të vogla dhe të mesme”.
“Tanimë të gjitha këtë ndërmarrje, janë të mirërregulluara me bazë ligjore, janë të përcaktuara kategoritë e këtyre ndërmarrjeve, përfitimet që këto ndërmarrje do të kenë në të ardhmen nga buxheti i shtetit, për mbështetjen e tyre financiare dhe organizative në kuadër të gjithë trajnimeve që ne ofrojmë për zhvillimin e ndërmarrjeve të vogla dhe të mesme”, u shpreh Ibrahimaj.
Sipas saj, me miratimin e këtij ligji do t’i hapet rrugë zhvillimit të mëtejshëm të SME-ve, për të cilat pritet që në periudhën afatmesme të rritet me 10%, jo vetëm numri i tyre por edhe numri i punësuarve në këtë sektor.
Gjithashtu, tha ministrja, qeveria miratoi shtyrjen e afatit për pronarët përfitues deri në datën 1 prill 2022 çka do të thotë se të gjitha gjobat e vendosura apo të parashikuara do të anulohen dhe do të rimbursohen ato të paguara.
