Vizita e ambasadorit britanik në Shqipëri, Nick Abbott, pranë drejtuesve të Jet Bank ka rikthyer në vëmendje projektin e bankës së parë plotësisht digjitale në vend, një iniciativë që po ndiqet me interes jo vetëm nga tregu financiar, por tashmë edhe nga politika dhe institucionet.
Në një njoftim të publikuar nga Ambasada Britanike në Tiranë, bëhet e ditur se ambasadori Abbott zhvilloi një takim me Fatbardha Rinon, drejtoreshë ekzekutive e Jet Bank, bankës së parë plotësisht digjitale në Shqipëri, e ndërtuar me kapital britanik. Sipas ambasadës, gjatë takimit u diskutua mbi rrugëtimin e bankës, që nga fazat e para të krijimit deri te sfidat e hyrjes në tregun bankar shqiptar me një koncept inovativ.
Ambasada Britanike e konsideroi këtë takim si reflektim të marrëdhënieve të forta mes Mbretërisë së Bashkuar dhe Shqipërisë, si edhe të angazhimit të përbashkët për mbështetjen e ideve të reja dhe rritjes ekonomike në rajon.
Jet Bank ka hyrë së fundmi edhe në qendër të debatit publik dhe politik në vend. Vetëm një ditë më parë, banka u përmend edhe gjatë seancës plenare në Kuvend, ku pati diskutime në nivel politik.
Jet Bank mori licencën nga Banka e Shqipërisë më 25 mars 2026, duke shënuar një moment të rëndësishëm për sektorin bankar në vend. Pas licencimit, banka ka hyrë tashmë në një fazë testimi paraprak, gjatë së cilës platforma do të jetë e aksesueshme për një grup të përzgjedhur përdoruesish.
Kjo fazë synon të mbledhë reagime mbi përvojën e përdoruesit, funksionalitetet dhe performancën e sistemit, përpara se banka të bëhet plotësisht operacionale për publikun e gjerë. Paralelisht, produktet dhe shërbimet do të ndërtohen gradualisht, mbi bazën e kërkesave dhe feedback-ut të klientëve, me synimin që çdo produkt të adresojë nevoja konkrete të tregut.
Jet Bank prezantohet si banka e parë 100% digjitale në Shqipëri, duke synuar të sjellë një standard të ri në mënyrën e ofrimit të shërbimeve financiare. Modeli i saj mbështetet te teknologjia dhe automatizimi i proceseve, pa degë fizike tradicionale, në një kohë kur sektori bankar po përjeton transformime të shpejta edhe në tregjet ndërkombëtare.
Hyrja e një banke tërësisht digjitale në tregun shqiptar shihet si një test i rëndësishëm për gatishmërinë e konsumatorëve dhe të vetë sistemit financiar për t’u përshtatur me modelet e reja të bankimit, ku shpejtësia, aksesi online dhe kostot më të ulëta operacionale konsiderohen avantazhet kryesore. /ekofin.al
