Kursi i këmbimit po përjeton prej disa javësh tashmë një stabilitet, që ndonjëherë duket i pazakontë. Këtë e dëshmojnë jo vetëm kuotimet e agjencive të këmbimit valutor që lëvizin shumë pak dita-ditës, sidomos sa i përket Euros, por edhe vetë kursi i publikuar nga Banka e Shqipërisë.
Ashtu siç nisi java, edhe këtë të martë, Euro sot blihet me 99.9 lekë, ndërsa në shitje me 100.6 lekë. Pak a shumë e njëjta situatë paraqitet edhe me monedhat e tjera kryesore, që nuk kanë patur lëvizje të mëdha.
Dollari amerikan blihet me 91.6 lekë dhe shitet 92.6 lekë. Paundi britanik sot blihet me 118.7 lekë dhe shitet me 119.7 lekë. Franga zvicerane këmbehet sot në blerje me 102 lekë, në shitje me 103 lekë.
Periudha e verës, vitet e tjera, janë karakterizuar nga një zhvlerësim i ndjeshëm i monedhave të huaja dhe forcim i Lekut, për shkak të prurjeve të mëdha të valutës nga turistët, por deri tani një gjë e tillë nuk është shumë e ndjeshme, edhe për shkak se Leku ka qëndruar i fortë thuajse gjatë gjithë kësaj periudhe, por asnjë nuk ka zbritur poshtë kufirit psikologjik 100 në kuotimin me Euro-n. Ekofin.al
