Ish-deputetja e Partisë Socialiste, Blerina Gjylameti, është emëruar këtë të mërkurë në krye të Autoritetit Kombëtar të Ushqimit.
Duke filluar nga sot, Gjylameti do të drejtojë këtë institucion me rëndësi të madhe për sigurinë ushqimore, duke zëvendësuar kështu në këtë post Manush Kullollit, detyrë të cilën e mbante prej marsit të vitit të kaluar.
Emërimi i ish-deputetes vjen pak kohë pas zgjedhjeve parlamentare të 11 majit, ku nuk arriti të sigurojë një mandat deputeti. Megjithatë, ajo mbetet një emër i njohur në radhët e Partisë Socialiste, me një përvojë të gjatë parlamentare.
Në zgjedhjet e fundit, Gjylameti arriti të grumbullojë 6,167 vota, duke zhvilluar një garë të fortë “kokë më kokë” me Olta Xhaçkën.
Pas procesit zgjedhor, ajo iu drejtua edhe Komisionit Qendror të Zgjedhjeve me një kërkesë zyrtare, ku kërkonte vënien në dispozicion të pamjeve filmike të numërimit të votave në të gjitha qendrat e votimit në Tiranë, për të verifikuar procesin. Por, sërish nuk mundi që të bëhej pjesë e legjislacionit të ri parlamentar.
Ndonëse pasi kryeministri Rama njoftoi se Ogerta Manastirliu do të ishte kandidate për Bashkinë e Tiranës dhe rrjedhimisht do të linte mandatin e deputetit i cili sipas rregullit do t’i kalonte Gjylametit, zhvillimet e fundit dhe vendimi i Gjykatës Kushtetuese për rastin “Veliaj”, bënë që ish-deputetes socialiste t’i “shuheshin shpresat” për një ulëse në Kuvend.
