Mungesa e transparencës qeveritare dhe sistemi gjyqësor, vijojnë te jenë dy problematikat më të mëdha me të cilat përballen investitorët e huaj në vendin tonë dhe që ndikon negativisht në të bërit biznes. Shoqata e Investitorëve të Huaj në Shqipëri ( FIAA) ka prezantuar Rezultatet e Pyetësorit mbi klimën e Biznesit në Shqipëri 2021-2022.
Në përgjigje të shqetësimeve të ngritura nga bizneset, Ministrja e Financave Delina Ibrahimaj u ndal tek reforma në drejtësi, ku theksoi se përfundimi i saj do t’i japë zgjidhje këtyre problematikave.
Ndërkohë që bëri me dije se po përgatitet një ligj i ri për investimet strategjike që do të krijojë lehtësi të mëtejshme dhe do ta bëjë vendin edhe më tërheqës për investitorët e huaj.
Ministrja Ibrahimaj ftoi investitorët e huaj që të përfitojnë nga avantazhet që ofrojnë disa sektorë në vend si energjia, turizmi, bujqësia, IT, për të cilët aplikohen edhe lehtësira.
