Investimet e huaja direkte në Shqipëri kanë vijuar trendin rritës edhe gjatë vitit 2025, duke arritur në rreth 1.63 miliardë euro, nga 1.58 miliardë euro në vitin 2024. Kjo përkthehet në një rritje prej rreth 3.2% në terma vjetorë, duke konfirmuar një tjetër vit rekord për hyrjet e kapitalit të huaj në ekonomi dhe duke reflektuar një interes të qëndrueshëm të investitorëve për tregun shqiptar.
Të dhënat e detajuara të publikuara nga Banka e Shqipërisë tregojnë se kjo rritje është mbështetur nga një shpërndarje e gjerë gjeografike e investimeve, por me kontribute të forta nga disa ekonomi kyçe. Holanda rezulton një nga burimet më të rëndësishme të kapitalit, me një rritje të ndjeshme të flukseve sidomos në tremujorin e katërt të vitit 2025, ku investimet arritën në mbi 72 milionë euro vetëm në këtë periudhë . Një rol të rëndësishëm vijon të ketë edhe Turqia, e cila mbetet ndër investitorët kryesorë me flukse të larta gjatë gjithë vitit, ndërsa Italia dhe Austria konfirmojnë pozicionin e tyre tradicional si partnerë strategjikë në ekonominë shqiptare, me kontribute të qëndrueshme në çdo tremujor.
Nga ana tjetër, të dhënat tregojnë edhe zhvillime interesante në disa vende të tjera. Kosova ka shënuar një rritje të fortë të investimeve, veçanërisht në tremujorin e tretë të vitit 2025, ku fluksi arriti mbi 90 milionë euro, një nga nivelet më të larta për këtë vend. Gjithashtu, Shtetet e Bashkuara kanë regjistruar një rritje të ndjeshme në tremujorin e dytë, ndërsa Gjermania dhe Zvicra kanë ruajtur një prani të qëndrueshme në strukturën e investimeve. Në tërësi, dinamika e investimeve tregon jo vetëm rritje në vlerë, por edhe një diversifikim më të madh të burimeve, duke reflektuar një bazë më të gjerë besimi ndaj ekonomisë shqiptare dhe potencialit të saj afatgjatë. /ekofin.al
