IMT, Policia Bashkiake, Policia e Shtetit, dhe IKMT kanë nisur një aksion të përbashkët për inventarizimin e hapësirave publike. Aksioni në terren do të evidentojë si hapësirat me leje edhe ato pa leje, si dhe hapësirat e liruara vullnetarisht apo ato të bllokuara padrejtësisht.
Ky është vetëm një prej hapave të një fushate më të gjerë në të gjithë vendin për të rikthyer trotuaret, sheshet dhe hapësirat publike tek qytetarët. Askush nuk është mbi ligjin. Asnjë subjekt nuk ka të drejtë të pushtojë hapësira publike në kurriz të komunitetit, thuhet në postimin e IMT-së.
IMT gjithashtu ka përgëzuar iniciativën e shumë subjekteve që kanë nisur çmontimin e strukturave pa leje. Njëkohësisht, Insektorati apelon për çdo subjekt, që të lirojë vullnetarisht hapësirat publike dhe kontribuojë për një qytet më të pastër, më të sigurt dhe të aksesueshëm për të gjithë!
Thirrja vlen edhe për qytetarët për t’u bërë pjesë e aksionit duke denoncuar hapësirat publike të zëna.
Në fundjavë, Kryeministri deklaroi fundin e fenomenit “tokë e xanun”. Përmes postimeve në rrjetet sociale, Rama u bëri thirrje zaptuesve të lirojnë hapësirat publike si në Tiranë, ashtu edhe në Vlorë.
Kryeministri deklaroi se “kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e “doganave” rreth pallateve, do të ballafaqohet jo vetëm me gjobat përkatëse po edhe me ndjekjet përkatëse penale për shkatërrim të pronës publike, cenim të shëndetit e sigurisë fizike së qytetarëve dhe me radhë…”.
Po kështu, Rama u bëri thirrje të gjithë zaptuesve të trotuareve në Lungomare që të lirojnë hapësirat publike. Kryeministri u la atyre “48 orë afat për t’u kthyer qytetarëve dhe turistëve trotuarët e tyre dhe për t’i larguar të gjitha llojet e hekurishteve e të betonarmeve, duke i tërhequr njëkohësisht “pergolatat” në vijën e parashikuar nga projekti i Lungomares”, afat i cili ka përfunduar sot./ekofin.al
