Intesa Sanpaolo ka shpallur nisjen e një oferte publike vullnetare për blerjen dhe shkëmbimin e të gjitha aksioneve të zakonshme të Banca Monte dei Paschi di Siena (MPS), në një lëvizje strategjike që synon forcimin e pozicionit të saj si një nga grupet financiare lider në Evropë.
Sipas kushteve të ofertës, Intesa Sanpaolo ofron 16 aksione të reja për çdo 10 aksione të MPS-së, si dhe 1 Euro në para për secilin aksion të paraqitur, duke reflektuar një premium prej 12.5% krahasuar me çmimin e mbylljes së aksionit më 5 qershor 2026.
Transaksioni synon të përforcojë lidershipin e Grupit në fushat e Menaxhimit të Pasurisë, Mbrojtjes dhe Këshillimit Financiar, duke krijuar vlerë të qëndrueshme për aksionarët, klientët, punonjësit dhe komunitetin.
Një element kyç i marrëveshjes është bashkëpunimi me Unipol Assicurazioni, i cili parashikon transferimin e një pjese të aktiviteteve të MPS-së, ndërsa Intesa Sanpaolo do të mbajë asetet strategjike, përfshirë pjesëmarrjen në Mediobanca dhe segmentet me potencial më të lartë fitimprurës.
Pas përfundimit të transaksionit, Grupi i kombinuar pritet të bëhet grupi i dytë më i madh bankar në Eurozonë për nga kapitalizimi i tregut; të menaxhojë rreth 1.700 miliardë euro asete financiare të klientëve; t’u shërbejë mbi 27 milionë klientë; të forcojë pozicionin lider në Menaxhimin e Pasurisë, Financimin e Konsumatorit dhe Bankingu Korporativ e të Investimeve.
Intesa Sanpaolo parashikon që deri në vitin 2029 fitimi neto i Grupit të kombinuar të kalojë 16 miliardë euro, ndërsa shpërndarja totale për aksionarët për periudhën 2025–2029 të arrijë në rreth 61 miliardë euro.
Transaksioni pritet të sjellë gjithashtu përfitime sociale dhe ekonomike, përfshirë punësimin e rreth 6.800 të rinjve deri në vitin 2029, mbështetje më të madhe për ekonominë reale dhe forcim të angazhimeve për zhvillim të qëndrueshëm.
