Veprimtaria e institucionit të Inspektorit të Lartë të Drejtësisë për vitin 2024 nxjerr në dukje ritmin e ngadaltë të trajtimit të ankesave të qytetarëve, si dhe hetimet disiplinore të papërfillshme në numër, krahasuar me to.
Sipas raportit, për vitin 2024 u shqyrtuan 1378 ankesa, ndërsa u hetuan vetëm 25 subjekte, gjyqtarë e prokurorë.
Ndërkohë raporti vë gjithashtu në dukje se krerët e gjyqësorit e prokurorive i marrin në mbrojtje magjistratët e tyre. Kështu, në ILD janë paraqitur vetëm 2 ankime nga kryetarët e gjykatave dhe 20 nga drejtuesit e prokurorive.
Hetimet Disiplinore
Inspektori i Lartë i Drejtësisë në zbatim të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar, fillon hetimin nëse ka dyshime të arsyeshme se shkelja mund të jetë kryer, bazuar në faktet dhe provat e mbledhura, që justifikojnë fillimin e hetimit.
Hetimi nis gjithashtu me iniciativë, bazuar në të dhëna thelbësore mbi fakte që rezultojnë nga burime të besueshme, mbi bazën e të cilave lind dyshimi i arsyeshëm se shkelja mund të jetë kryer.
Nga rreth 2874 ankesa, ILD konstatoi ekzistencën e dyshimeve të arsyeshme dhe ka miratuar vetëm 23 vendime për hetim disiplinor, me anë të të cilave janë hetuar shkeljet e pretenduara ndaj veprimtarisë së 25 subjekteve. Edhe nga ky numër i vogël, sërish për pjesën më të madhe, 14 subjekte hetimi ka filluar mbi bazë ankese, ndërsa për 11 subjekte ka filluar me iniciativë. Gjithashtu ILD ka vijuar edhe me hetimet e filluara nga viti 2023, thuhet në raport.
Të dhënat për hetimin
Gjatë vitit 2024, nga hetimet e nisura me iniciative në 2 raste Inspektori i Lartë i Drejtësisë ka kryer edhe hetime pasurore, nisur nga të dhënat e denoncuara në publik.
Të dhënat për hetimet e filluara përfshijnë vetëm 5 magjistratë (3 gjyqtarë dhe 2 prokurorë) për të cilët janë paraqitur pranë Këshillave respektivë kërkesat për procedim, ku për 4 subjekte është mbyllur hetimi. Ndërkohë, për 17 magjistratë (10 gjyqtarë dhe 7 prokurorë) të hetimit disiplinor, procedurat hetimore mbeten në proces.
Hetimi disiplinor për 25 subjekte të hetimit disiplinor ka filluar pas dyshimeve të arsyeshme se shkelja e pretenduar mund të jetë kryer.
Shkeljet disiplinore për të cilat institucioni i Inspektorit të Lartë të Drejtësisë ka nisur hetimin disiplinor, lidhen me veprim, mosveprim ose sjellje të magjistratit, që sjell përfitime të padrejta ose dëme për palët në një proces gjyqësor; ose procedurë hetimore, në kundërshtim me ligjin, për 8 raste;
Gjithashtu, vonesa të përsëritura ose që sjellin pasoja të rënda apo zvarritje të pajustifikuara të veprimeve dhe/ose akteve procedurale, për 6 raste; mospërmbushja e pajustifikuar ose e përsëritur e funksioneve gjatë gjykimit ose hetimit, për 4 raste; mosparaqitje të kërkesës për heqje dorë nga procedimi ose gjykimi i çështjes, kur kjo është e detyrueshme sipas ligjit, nëse magjistrati ka dijeni ose duhet të kishte dijeni të rrethanave të tilla për 2 raste; si dhe shkelje të tjera në 20 raste.
Masat disiplinore të propozuara
Inspektori i Lartë i Drejtësisë ka paraqitur kërkesa për procedim disiplinor në Këshillin e Lartë Gjyqësor, duke propozuar si masë disiplinore “Shkarkim nga detyra” – 6 raste. Nga shqyrtimi në Këshillin e Lartë Gjyqësor rezulton se janë pranuar vetëm 2 kërkesa për procedim disiplinor.
Ndërkohë, Inspektori i Lartë i Drejtësisë ka paraqitur 5 kërkesa për procedim disiplinor në Këshillin e Lartë të Prokurorisë, duke propozuar si masë disiplinore: “Vërejtje konfidenciale” në 2 raste; “Ulje e përkohshme e pagës deri në masën 40% për një periudhë njëvjeçare”në 3 raste, por që u pranua nga KLP në një rast me ndryshim mase nga ulje page, në “vërejtje publike”. /ekofin.al
