Inflacioni në Shqipëri, i matur sipas metodologjisë së harmonizuar evropiane, rezultoi 3% në gusht 2026, duke treguar se presionet mbi çmimet mbeten më të larta kur matja bëhet sipas standardit që përdoret për krahasimin e inflacionit mes vendeve evropiane.
Sipas të dhënave të publikuara nga INSTAT, Indeksi i Harmonizuar i Çmimeve të Konsumit (IHÇK) u rrit me 3% krahasuar me gushtin e vitit të kaluar. Në raport me korrikun 2026, megjithatë, çmimet e konsumit shënuan një ulje të lehtë prej 0,1%.
Të dhënat tregojnë se presioni më i madh në inflacionin vjetor vijon të vijë nga ushqimet. Grupi “Ushqime dhe pije joalkoolike” dha +0,74 pikë përqindje në inflacionin total, ndërsa çmimet e këtij grupi ishin 2,1% më të larta se një vit më parë.
Një ndikim të rëndësishëm pati edhe transporti. Çmimet në këtë grup u rritën me 7% në terma vjetorë, duke kontribuar me 0,59 pikë përqindje në normën totale të inflacionit. Edhe më e fortë ishte rritja e çmimeve në grupin “Argëtim, sport dhe kulturë”, me 8,5%, ndërsa kontributi i tij në inflacion arriti në 0,55 pikë përqindje.
Në një ekonomi ku turizmi ka marrë një peshë gjithnjë e më të madhe, bie në sy edhe ecuria e çmimeve të restoranteve dhe akomodimit. Ky grup regjistroi një rritje vjetore prej 3,5% dhe kontribuoi me 0,51 pikë përqindje në inflacionin e gushtit.
Çmimet e pijeve alkoolike dhe duhanit u rritën me 3,6%, shërbimi arsimor me 3,3%, ndërsa shëndeti me 2,1%. Në krahun tjetër, dy kategori regjistruan ulje vjetore: “Veshje dhe këpucë” me 2% dhe “Informacioni dhe komunikimi” me 1%.
Në krahasimin mujor, panorama ishte disi më e favorshme për konsumatorët. Rënia prej 0,1% e IHÇK-së ndaj korrikut u ndikua kryesisht nga ushqimet dhe pijet joalkoolike, si dhe veshjet dhe këpucët, ku çmimet ranë me nga 0,9%. Pijet alkoolike dhe duhani u liruan me 0,4%, ndërsa mobiljet dhe pajisjet e shtëpisë me 0,2%.
Në drejtim të kundërt lëvizi transporti, ku vetëm brenda një muaji çmimet u rritën me 2,1%. Restorantet dhe shërbimet e akomodimit u shtrenjtuan me 0,3%, ndërsa grupet e lidhura me qiranë, ujin, energjinë dhe karburantet e tjera, si dhe shëndeti, me nga 0,1%.
Në krahasim me vendet evropiane, grafiku i INSTAT për gushtin e vendos Shqipërinë me inflacionin e harmonizuar prej 3%, ndërsa mesatarja e Bashkimit Evropian paraqitet në 3,2%. Kështu, sipas kësaj matjeje të krahasueshme me standardin evropian, inflacioni në Shqipëri në gusht ishte lehtësisht poshtë nivelit të BE-së./ekofin.al

