Ministrja e Ekonomisë dhe Inovacionit, Delina Ibrahimaj prezantoi sot pasqyrën më të fundit mbi performancën ekonomike të vendit, në konferencën me temë “Stabilitet dhe Zhvillim përmes Ekonomisë dhe Inovacionit”.
Gjatë fjalës së saj, ministrja theksoi se ekonomia shqiptare po njeh një rritje të qëndrueshme, e mbështetur nga rritja e konsumit të familjeve dhe e investimeve.
Ibrahimaj tha se, “referuar të dhënave të INSTAT, gjatë 3-mujorit të dytë të këtij viti, Prodhimi i Brendshëm Bruto u rrit në 3,51%, rritje që është ndjeshëm më e lartë se mesatarja e rritjes së BE – që mesatarisht ishte 1,5% – por më e lartë edhe se zhvillimet në vendet e rajonit të Ballkanit Perëndimor që ishte 2,9%”.
“Të gjithë treguesit ekonomikë flasin për një rritje të konsumit të familjeve”, u shpreh Ibrahimaj, duke nënvizuar se përmirësimi i të ardhurave dhe rritja e pagave po ndikojnë drejtpërdrejt në fuqizimin e kërkesës së brendshme.
Një tjetër element kyç, i përmendur nga ministrja, ishte Prodhimi Bruto i Kapitalit Fiks (PBKF), i cili është në rritje dhe tregon për një rigjallërim të investimeve në ekonomi.
“Prodhimi Bruto i Kapitalit Fiks është rritur, duke reflektuar një kërkesë në rritje në ekonomi”, deklaroi Ibrahimaj.
Ministrja theksoi gjithashtu rolin e politikave të inovacionit dhe digjitalizimit në zhvillimin ekonomik, duke shtuar se qeveria është e angazhuar për të nxitur një model të ri ekonomik, të bazuar në teknologji, sipërmarrje dhe kapital njerëzor.
Ibrahimaj theksoi se stabiliteti makroekonomik, mbështetja për sektorët prodhues dhe nxitja e investimeve do të vijojnë të jenë shtylla kryesore të zhvillimit ekonomik në Shqipëri.
Ibrahimaj tha se kërkesa e brendshme ka qenë motori kryesor i rritjes ekonomike, me një rritje prej gati 5% në tremujorin e dytë të vitit.
“Kjo kërkesë është ndikuar ndjeshëm si nga konsumi, ashtu edhe nga investimet, duke reflektuar rritjen e besimit dhe fuqizimin e ekonomisë vendase”, theksoi ajo, teksa evidentoi konsumin si shtyllën kryesore të zhvillimit ekonomik.
Sipas ministres, konsumi kontribuoi në 70% të rritjes ekonomike, me një rritje prej 3,83% gjatë tremujorit të dytë të këtij viti. Kjo është mbështetur nga: Rritja e pagave; normat pozitive të punësimit dhe rritja e importeve të ushqimeve, si tregues i drejtpërdrejtë i konsumit të familjeve.
Po ashtu, konsumi i administratës publike shënoi një rritje të ndjeshme prej 12,44%, duke ndikuar pozitivisht në PBB-në e vendit.
Ibrahimaj theksoi se investimet dhe besimi i biznesit janë në rritje.
“Investimet në ekonomi janë rritur me 4,33%, çka tregon një kërkesë në rritje nga ana e bizneseve shqiptare për zgjerim dhe zhvillim. Ministrja theksoi gjithashtu se eksportet e mallrave dhe shërbimeve u rritën me 0,97%, ndërsa importet me 3,26%, duke treguar për një aktivitet ekonomik më të zgjeruar”, u shpreh ministrja.
Sipas të dhënave të prezantuara, Investimet e Huaja Direkte (IHD) arritën në 759 milionë euro në gjashtëmujorin e parë të 2025-s, një rritje me 8 milionë euro krahasuar me të njëjtën periudhë të vitit 2024.
Italia dhe Turqia kryesojnë listën e investitorëve me rritjen më të lartë, ndërsa rritje shënuan gjithashtu investimet nga Austria dhe Kosova.
Ministrja theksoi se, “33,3% e IHD-ve janë përqendruar në sektorin e pasurive të paluajtshme; 19,3% në sektorin financiar; 13% në industrinë nxjerrëse, ndërsa pjesa tjetër ndahet mes tregtisë, industrisë përpunuese dhe sektorit të energjisë e gazit”.
“Rreth 50% e fluksit të investimeve të huaja janë riinvestime nga sipërmarrje ekzistuese të huaja, çka tregon për rritjen e besimit në tregun shqiptar dhe përmirësimin e klimës së biznesit”, u shpreh Ibrahimaj.
E pyetur nga gazetarët për raportin e publikuar nga Departamenti Amerikan i Shtetit ku ngre shqetësim korrupsionin dhe pengesat që hasin investitorët e huaj, ministrja e Ekonomisë dhe Inovacionit tha se me qëllim reduktimin e ekonomisë informale qeveria do të zbatojë një plan trevjeçar që synon reduktimin e përdorimit të parasë në dorë (cash), në bashkëpunim me Bankën e Shqipërisë dhe institucionet bankare të vendit.
“Ky plan përfshin një seri masash që do të zbatohen gjatë tre viteve të ardhshme me synimin për të luftuar ekonominë informale, për të rritur konkurrueshmërinë e bizneseve dhe për të përmirësuar klimën e investimeve në vend.
Reduktimi i parasë “cash” është një hap i rëndësishëm drejt formalizimit të ekonomisë dhe luftës kundër korrupsionit dhe pastrimit të parave. Dalja e Shqipërisë nga lista gri nga MONEYVAL para dy vitesh ishte një arritje, por tani na nevojitet një qasje më e strukturuar dhe afatgjatë për të garantuar besimin e investitorëve dhe për të ulur kostot financiare për bizneset që operojnë me tregjet ndërkombëtare. Shqipëria gjithashtu është bërë pjesë e sistemit SEPA (Zona e Pagesave në Euro), çka pritet të sjellë ulje të mëtejshme të kostove të transaksioneve financiare”, pohoi Ibrahimaj.
Ajo u ndal te bujqësia dhe perspektiva afatgjatë e zhvillimit të këtij sektori.
“Pavarësisht se sektori i bujqësisë, pyjeve dhe peshkimit shënoi një rënie të lehtë për shkak të uljes së prodhimit në blegtori dhe peshkim, bujqësia në vetvete pati një rritje prej 2,62% në tremujorin e dytë të vitit”, tha Ibrahimaj.
Ajo njoftoi se në katër vitet e ardhshme do të ketë një vëmendje të shtuar ndaj sektorit të bujqësisë.
“Aktualisht ka një fond prej 250 milionë euro në dispozicion të kreditimit të bujqësisë nga Banka e Shqipërisë, dhe bashkë me Fondin e Garancisë, kredia për bujqësinë lëvrohet me interes 2%. Ndërkohë qeveria ka miratuar ngritjen e Bankës së Zhvillimit, që do të injektojë financim të qëndrueshëm me fondet e qeverisë shqiptare, por dhe ato të huaja, për SME-të dhe bujqësinë që kanë më shumë nevojë për rritjen e produktivitetit”, u shpreh Ibrahimaj.
Delina Ibrahimaj shtoi se prej datës 1 tetor do të hyjë në fuqi norma e indeksimit për pensionistët, në masën 2,5%. Ajo theksoi se efekti financuar në buxhetin e shtetit, për këtë normë indeksimi pensionesh është rreth 1,1 miliardë lekë.
“Norma 2,5% pasqyron rritjen e çmimeve për shportën e pensionistëve dhe kjo është pak më e lartë se norma mesatare e indeksit të konsumit për periudhën korrik 2024 – gusht 2025. Nuk duhet të kategorizohet si një rritje e pensioneve, por si një politikë që ne e kemi ndjekur çdo vit, pasi duhet të garantojmë që rritja e çmimeve të mos prekë masën e përfitimit të pensionistëve”, tha Ibrahimaj.
Ibrahimaj u ndal edhe te reforma e pensioneve, të cilën e konsideroi si një punë në proces.
“Nuk është një vendimmarrje e shpejtë, pasi targeti jonë për katërvjeçarin e ardhshëm është rritja e pensionit minimal dhe mesatar. Indeksimi i pensioneve e ka efektin financiar në total rreth 1,1 miliardë lekë. Janë 753 mijë pensionistë, por edhe përfitues të skemave të tjera që llogariten rreth 143 mijë afërsisht”, vijoi ajo.
Ministrja Ibrahimaj u shpreh se kontribut në rritjen e ekonomisë në vend, në tremujorin e dytë të vitit kanë pasur sektorë si ndërtimi, shërbimet, turizmi dhe transporti. Në sektorin e industrisë ka pasur një rritje reale me 1,79%, sipas Ibrahimajt.
“Edhe industria përpunuese ka qëndruar në nivelet e vitit të kaluar, ndërsa për sektorin e tekstileve, ndonëse nuk ka ndonjë ndikim të madh në Prodhimin e Përgjithshëm Bruto, sërish ka ndikim në punësimin në vend. Industria ka sektorë që kanë qenë në rritje. Bujqësia, nga pyjet dhe peshkimi, ka pasur rritje me 2,62%. Pra, të gjithë sektorët e tjerë të ekonomisë kanë shfaqur rritje”, tha Ibrahimaj.
Ibrahimaj nënvizoi se edhe sektorët e informacionit dhe telekomunikacionit kanë pasur rritje dyshifrore, si sektorë kyç në ekonomi, pasi ecuria e tyre ndikon në gjithë sektorët e tjerë, si në shërbimet qeveritare, por edhe në modernizimin e sektorit privat.
“Pasuritë e paluajtshme, aktivitetet profesionale, unë pres që ne të kemi një kontribut pozitiv në rritje. Shërbimet vijojnë të kenë një rritje të lartë, por edhe sektorë prodhues që kanë potencial presim që të rriten. Turizmi u rrit me 19% në tremujorin e dytë dhe këtu u mat aktiviteti në hoteleri dhe turizëm”, theksoi Ibrahimaj.
