Hyn në fuqi vendimi i Komisionit të Ndihmës Shtetërore që autorizon ndihmën në formën e fondeve për ndërmarrjet sociale që kontribuojnë në mbrojtjen shoqërore dhe mbështetjen e grupeve të pafavorizuara, nëpërmjet punësimit të tyre dhe ofrimit të shërbimeve për to.
Skema, në formën e granteve nga buxheti i shtetit me 210 milionë lekë do të zbatohet në periudhën 2026–2028 dhe do të shtrihet në gjithë vendin. Në projektvendimin e Këshillit të Ministrave të referuar në formularin enjoftimit është parashikuar se një ndërmarrje sociale di të financohet nëpërmjet subvencionimit të pagës minimale dhe i sigurimeve të detyrueshme shoqërore dhe shëndetësore.
Autorizimi vjen pas vlerësimit të ekzistencës së ndihmës dhe përputhshmërisë së skemës.
Komisioni i Ndihmës Shtetërore vlerëson se plani i mbështetjes për ndërmarrjet sociale përbën ndihmë shtetërore, pasi siguron një avantazh ekonomik nga burime publike, që nuk do të përfitohej në kushte normale tregu dhe që mund të ndikojë në konkurrencë.
Skema plotëson katër kriteret ligjore të ndihmës shtetërore: financohet nga burime shtetërore, krijon avantazh ekonomik, u drejtohet një kategorie të përzgjedhur përfituesish dhe ka potencial ndikimi në treg. Financimi realizohet nga buxheti i miratuar për Ministrinë e Shëndetësisë dhe Mirëqenies Sociale dhe synon mbështetjen e punësimit të grupeve të pafavorizuara.
Megjithëse subvencionimi u jep përparësi ndërmarrjeve sociale ndaj operatorëve të tjerë, Komisioni vlerëson se masa ka karakter social dhe synon përfshirjen e grupeve vulnerabël. Për këtë arsye, ajo nuk cenon funksionimin normal të tregut dhe nuk shkakton shtrembërim të ndjeshëm të konkurrencës.
Po kështu, Komisioni i Ndihmës Shtetërore vlerëson se skema e mbështetjes për ndërmarrjet sociale është në përputhje me legjislacionin në fuqi, pasi plotëson kriteret e ndihmës “De minimis”. Sipas këtyre dispozitave, ndihma lejohet vetëm nëse nuk tejkalon kufirin maksimal të parashikuar për një periudhë trevjeçare dhe është e matshme në mënyrë të qartë.
Në këtë kuadër, Komisioni konstaton se financimi për ndërmarrjet sociale do të jepet nga buxheti i shtetit vetëm brenda kufirit prej 14.000.000 lekësh për çdo përfitues dhe në përputhje me kriteret ligjore. Përfituesit janë të detyruar të nënshkruajnë deklaratën “De minimis” dhe ta dorëzojnë pranë Ministrisë së Shëndetësisë dhe Mirëqenies Sociale./ekofin.al
