Autoriteti Rrugor Shqiptar ka shpallur tenderin për “Ndërtimin e rrugëve lidhëse në Tunelin e Llogarasë”.
Fondi limit i kontratës është: 506,639,914.59 (pesëqind e gjashtë million e gjashtëqind e tridhjetë e nëntë mijë e nëntëqind e katërmbëdhjetë pike pesëdhjetë e nëntë) Lekë pa TVSH. Kohëzgjatja e kontratës parashikohet 10 muaj.
Sipas dokumenteve të tenderit, Autoriteti Kontraktor për zbatimin dhe realizimin e objektit me sukses dhe cilësi do të gjykojë mbi përvojën e mëparshme të operatorit i cili do të zbatojë këtë kontratë dhe jo në përvojën e një operatori tjetër i cili i mbështet thjesht për t’u kualifikuar, por nuk merr përsipër të kryejë asnjë shërbim gjatë zbatimit. Do ishte një vlerësim jo korrekt nga ana e autoritetit nëse do lejonte mbështetjen në përvojë të ngjashme dhe operatori i cili do të fitonte kontratën nuk do të kishte përvojën e duhur, si dhe për më tepër të mbajë përgjegjësi për mos përmbushje të kontratës, thuhet në dokument.
Gjithashtu, lejimi i mbështetjes në subjekte të tjera përbën një risk shumë të madh për zbatimin e kontratës dhe përfundimin e saj me standard dhe cilësi.
Licenca është dokument juridik e profesional, që i jep të drejtë disponuesit të saj të ushtrojë veprimtari të caktuar, sipas: I. Kategorive të punimeve të zbatimit duke u mbështetur në: – profilin e diplomës universitare të individëve që punësohen në rolin e drejtuesit teknik të shoqërisë. II. Klasifikimit të kategorive të përfituara duke u mbështetur në 3 elemente: – Vlerën e punëve të ngjashme të kryera 4 vitet e fundit si shoqëri; – Përvojën në punë të individit/ëve që punësohen në rolin e drejtuesit teknik të shoqërisë; – Kapacitetet financiare. Duke qenë se pikat e licencës përfitohen si rezultat i eksperiencës dhe cilësisë, ato i përkasin vetë shoqërisë, dhe shfrytëzohen në harmoni me të gjithë komponentët që përbëjnë këtë shoqëri.
Duke u nisur nga këto fakte, Autoriteti gjykon se një operator ekonomik nuk do të realizonte me sukses zbatimin e kontratës në qoftë se nuk do të dispononte pikën e licencës për atë kategori dhe përvojën e ngjashme.
Gjithashtu, Autoriteti Kontraktor nuk kufizon mundësinë e bashkimit të operatorëve ekonomikë për të përmbushur këto kritere, thuhet në procesverbal.
