Guimarães një qytet i trashëgimisë botërore UNESCO ndodhet në distriktin verior portugez të Bragas me rreth 156,000 banorë dhe për shkak të rolit të tij në themelimin e vendit, njihet si “djepi i kombësisë portugeze”.
Sipas Komisionit Evropian, qyteti u dallua për angazhimin e tij të vazhdueshëm ndaj zhvillimit të qëndrueshëm, me rezultate të jashtëzakonshme për cilësinë e ajrit, zhurmën, ujin, biodiversitetin, zonat e gjelbra dhe përdorimin e tokës, mbetjet dhe ekonominë rrethore dhe përshtatjen ndaj ndryshimeve klimatike.
Juria tha se Guimarães demonstroi një vizion që bashkon qytetarët, akademinë dhe sektorin privat. Motoja e bashkisë “One Planet City” u vlerësua gjithashtu për qasjen e saj që ndërthur shkencën me planifikimin lokal.
Guimarães doli në krye duke lënë pas qytetet Heilbronn në Gjermani dhe Klagenfurt në Austri. Jashtë garës kryesore, Portugalia fitoi çmimin e dytë me Águeda që fitoi Gjethën e Gjelbër Evropiane së bashku me qytetin Vaasa, në Finlandë.
Komuna e Guimarães do të marrë një çmim prej 600,000 € për të ndihmuar në rritjen e qëndrueshmërisë mjedisore, ndërsa Águeda do të marrë 200,000 € për të njëjtin qëllim.
Çmimi Evropian i Kryeqytetit të Gjelbër u vendos në vitin 2010 nga Komisioni Evropian, me qëllimin për të inkurajuar qytetet që të bëhen më të gjelbërta dhe më të pastra, duke përmirësuar gjithashtu cilësinë e jetës së qytetarëve të tyre. Çmimi “Gjethja e Gjelbër” është krijuar për të vlerësuar përpjekjet e qyteteve më të vogla me nga 20 deri në 100 mijë banorë.
