Vienna Insurance Group (VIG) ka mbyllur vitin 2025 me një nga performancat më të forta në historinë e saj, duke konfirmuar rritje të ndjeshme të aktivitetit dhe fitueshmërisë, ndërsa paralelisht ka zgjeruar praninë në tregjet e Europës Qendrore dhe Lindore, përfshirë edhe Shqipërinë.
Sipas raportit vjetor të publikuar më 28 prill 2026, primet e shkruara bruto arritën në 16.3 miliardë euro, me një rritje prej 7.1% krahasuar me një vit më parë, ndërsa fitimi para taksave u rrit ndjeshëm në 1.16 miliardë euro, ose 31.7% më shumë në terma vjetorë.
Rritja është mbështetur edhe nga të ardhurat nga shërbimet e sigurimit, të cilat arritën në një nivel rekord prej 13.2 miliardë eurosh, në rritje me 8.7%. Në të njëjtën kohë, treguesi i kombinuar neto u përmirësua në 90.1%, duke reflektuar një menaxhim më efikas të kostove dhe rreziqeve.
Një tjetër element që nënvizon stabilitetin e grupit është raporti i mjaftueshmërisë së kapitalit në nivelin 296%, që konfirmon kapitalizimin shumë të fortë të kompanisë dhe aftësinë për të përballuar goditje të mundshme në tregje.
Në këtë kontekst, drejtuesit e grupit kanë propozuar rritjen e dividendit në 1.73 euro për aksion dhe presin që fitimi para taksave për vitin 2026 të arrijë në intervalin 1.25 deri në 1.3 miliardë euro, duke sinjalizuar vazhdimësi të ritmit të rritjes.
Përtej rezultateve financiare, viti 2025 është karakterizuar edhe nga hapa të rëndësishëm zgjerimi strategjik. Transaksioni më i madh në historinë e grupit mbetet marrja në kontroll e Nürnberger Beteiligungs-AG, që synon të forcojë më tej pozicionin në Europën Qendrore dhe Lindore.
Në rajon, VIG ka avancuar edhe në tregje të tjera, duke u bërë lider në Moldavi përmes blerjes së Moldasig dhe duke hyrë në segmentin e ndërmjetësimit financiar në Poloni.
Grupi operon aktualisht në mbi 30 vende me rreth 50 kompani sigurimi dhe fonde pensionesh, duke shërbyer rreth 33 milionë klientë dhe duke mbajtur një pozicion lider në rajonin e Europës Qendrore dhe Lindore. Në Shqipëri ai përfaqësohet më së miri përmes kompanisë Sigma Vienna Insurance Group, që ka njohur rritje dhe performancë pozitive edhe gjatë vitit 2025.
Në përgjithësi, performanca e vitit 2025 konfirmon jo vetëm rritjen e volumit të biznesit, por edhe rezistencën e modelit të VIG në një mjedis të pasigurt ekonomik, duke e vendosur grupin në një pozicion të favorshëm për zgjerim të mëtejshëm në vitet në vijim, përfshirë edhe tregje në zhvillim si Shqipëria. /ekofin.al
