Ministrja e Bujqësisë dhe Zhvillimit Rural, Frida Krifca pas mbledhjes së sotme të qeverisë, njoftoi miratimin e projektligjit “Për Organizimin dhe Funksionimin e Grupeve Vendore të Veprimit”, i cili përcakton parakushtet për krijimin dhe funksionimin e grupeve vendore të veprimit, duke vijuar procesin e përafrimit të legjislacionit shqiptar me atë të Bashkimit Europian.
Krifca theksoi se ky projektligj është konsideruar një histori suksesi në zhvillimin rural në vendet e Bashkimit Evropian, prandaj qasja LEADER ka potencialin të shndërrohet në një instrument shumë të rëndësishëm për fuqizimin e komuniteteve lokale edhe në Shqipëri duke i orientuar ato drejt një zhvillimi të integruar.
Sipas njoftimit ky Projektligj synon të rregullojë aktivitetin e strukturave, të cilat qendrojnë në themel të qasjes LEADER duke forcuar kapitalin social, inkurajuar përfshirjen e të gjithë aktorëve, ndihmuar në trajtimin e pengesave ekzistuese, si dhe duke krijuar mundësi të mira për shkëmbimin dhe përhapjen e informacionit dhe teknologjisë në zona më të largëta rurale.
Krifca u ndal edhe tek roli vendimmarrës që ka komuniteti në bashkëpunim me bashkitë, të cilat janë po ashtu të përfshira, duke vënë theksin tek fuqizimi i mekanizmit të transmetimit të kërkesave nga fermerët, sipërmarrësit, shoqatat dhe bashkitë drejt politikave publike.
‘Pas miratimit edhe nga kuvendi, ky ligj do të shërbejë si një motorr zhvillimi, i hartuar dhe zbatuar nga vetë aktorët lokalë,’ përfundoi Krifca.
