Për të katërtin vit radhazi, Tirana Bank, pjesë e Grupit BALFIN, zgjodhi të mbështesë një prej festivaleve më kuptimplota, që fokusin e ka tek edukimi dhe fuqizimi i të rinjve ambiciozë. Festivali Kombëtar i Sipërmarrjes – GEN-E-Albania, organizuar nga Junior Achievement of Albania, u mbajt më 8-9 maj në Piramidën e Tiranës, duke e kthyer këtë të fundit në një qendër të energjisë, kreativitetit dhe inovacionit të të rinjve.
Festivali mblodhi së bashku 150 nxënës nga i gjithë vendi, ndërsa vlerësoi dhe i kushtoi rëndësinë e duhur vizionit të 26 kompanive të krijuara prej tyre.
Tirana Bank ofroi krahas mbështetjes financiare, përvojën dhe ekspertizën e saj, duke qenë pjesë e jurisë që përzgjodhi kompanitë finaliste. Këto kompani parashikojnë risi në aplikacione të ndryshme, zgjidhje për çështje mjedisore, lehtësinë proceset bujqësore, risi në kujdesin e shëndetit mendor, por edhe për mirëqenien.
Në fjalën e saj përshëndetëse, Lila Canaj, Drejtuesja e Divizionit Retail në Tirana Bank, siguroi që të rinjtë do të kenë gjithnjë përkrahje nga banka.
“Ky aktivitet nuk është thjesht një garë, por një mundësi e çmuar për të rinjtë shqiptarë që të shprehin talentin dhe potencialin e tyre. Tirana Bank është gjithmonë e gatshme t’i mbështesë në këtë rrugëtim, sepse besojmë se së bashku mund të ndërtojmë liderët e së ardhmes”, – tha Canaj duke përforcuar vlerësimin e bankës për edukimin, si një nga shtyllat më të rëndësishme për zhvillimin afatgjatë të vendit.
Në mesin e fituesve, “SilverSprings” nga shkolla “Arben Broci” në Tiranë u shpall kompania më e mirë e festivalit. “FIPLAST”fitoi çmimin për idenë më inovative, ndërsa “METAL ART” nga Shkolla Profesionale e Korçës u vlerësua për përgatitjen për tregun e punës. Vlerësim mori edhe “ME’DIT” nga shkolla TES për planin më të mirë të marketingut dhe shitjes.
Përzgjedhja e finalistëve dhe e fituesve u bë mes 510 nxënësvetë cilët ishin pjesë e programit “Kompanitë e Nxënësve” të Junior Achievement of Albania. Ky program, gjatë vitit shkollor 2024-2025, u zhvillua në 41 shkolla të arsimit të mesëm dhe të lartë, duke angazhuar krahas nxënësve me shpirt sipërmarrës, edhe mësuesit.
Mes tyre, në përmbyllje të festivalit, mësuesi më i mirë i vitit u shpall Genci Nelaj, nga gjimnazi “Sherif Hoxha”, Koplik.
Tirana Bank vijon t’i qëndrojë besnike misionit të saj për të fuqizuar komunitetet dhe kryesisht të rinjtë, duke mbështetur evente si GEN-E-Albania, e rrjedhimisht duke shfaqur një angazhim të qëndrueshëm ndaj edukimit financiar dhe sipërmarrjes.
Për Tirana Bank, edukimi financiar është ajo çka i duhet çdo të riu përballë sfidave të tregut të punës. Kjo është edhe arsyeja se përse shfaqet kurdoherë pranë iniciativave që shërbejnë si urë lidhëse mes dijes dhe praktikës.
