Në qershor të vitit të kaluar, qeveria vuri në dispozicion 26 miliardë lekë përmes dy garancive sovrane në bashkëpunim me bankat tregtare për garantimin e huamarrjes së bizneseve, me qëllim që të kishin likuiditetin e nevojshëm për të financuar rimëkëmbjen e aktivitetit tregtar të prekur nga situata covid-19. Në garancinë sovrane 1 u vendosën në dispozicion 11 miliardë lekë për bizneset me qëllim të paguanin pagat e punonjësve. Kjo paketë u lëvrua në masën rreth 48 %, në vlerë 5.33 miliardë lekë dhe interesi i biznesit në tërësi ishte i ulët.
Për Paketën e Parë të Garancisë Sovrane, shteti përmes Ministrisë së Financave garantoi 100% principalin e huasë në rast mos shlyerje nga biznesi, ndërsa ka marrë përsipër të rimbursojë interesat e huave që do të trajtohen në Marrëveshje. Paketa e dytë prej 15 miliard lekësh garantoi huadhënien për biznese që kishin nevojë për kapital qarkullues dhe investime.
Afati për aplikim për kredi përmes garancisë shtetërore u shty deri në fund qershor 2021. Sipas të dhënave zyrtare, deri në fund të vitit 2020 janë lëvruar kredi permes kësaj skeme në masën e 8.33 miliard lekëve, apo 56% e planifikimit. Sipas Marrëveshjes së Garancisë Sovrane II, Ministria e Financave garanton 60% të principalit të Huasë, ndërkohë nuk merr përsipër garantimin e interesave, kamatëvonesave, penaliteteve apo çdo lloj detyrimi tjetër monetar, që mund të burojë nga Huatë që Banka u lëvron Bizneseve.
Afati maksimal i huas përcaktohet në 5 vite. Sipas të dhënave të Fianncave, deri në fund te muajit dhjetor 2020, në total kanë përfituar 308 biznese, kryesisht në sektorin e tregtisë, shërbimit apo prodhimit. Por ndërsa afati për aplikimin e bizneseve ka mbaruar ne Qershor të këtij viti, duket se kanë filluar problematikat në shlyerjen e dtyrimeve dhe marrëdhëniet banka-biznes-shtet.
